اٹلی کے شہر ویٹربو میں دہشت گردی کی کوشش ناکام، ترک شہری اسلحہ سمیت گرفتار

ویٹربو  (ڈیلی اردو) اٹلی کے شہر ویٹربو (Viterbo) میں پولیس نے ایک ترک شہری کو گرفتار کرلیا ہے جس پر الزام ہے کہ وہ ایک بڑے عوامی تہوار کے دوران دہشت گرد حملہ کرنے کی منصوبہ بندی کر رہا تھا۔ اطلاعات کے مطابق یہ مشتبہ شخص اسلحے کے ساتھ تہوار کے قریب موجود تھا اور سیکیورٹی اداروں کو خفیہ اطلاعات موصول ہونے کے بعد فوری کارروائی کی گئی۔

اطالوی میڈیا کے مطابق گرفتار شخص کی عمر 30 سال کے قریب ہے اور وہ مبینہ طور پر کسی شدت پسند گروہ سے تعلق رکھتا ہے۔ پولیس نے اس سے اسلحہ اور مشکوک سامان برآمد کیا ہے جبکہ مزید تحقیقات کے لیے اس کے رابطوں اور منصوبے کی نوعیت کا جائزہ لیا جا رہا ہے۔

ویٹربو کا یہ روایتی تہوار ہر سال منعقد ہوتا ہے جس میں ہزاروں افراد شرکت کرتے ہیں۔ حکام کے مطابق اگر یہ منصوبہ کامیاب ہوجاتا تو بڑے پیمانے پر جانی نقصان ہوسکتا تھا۔

پولیس اور سیکیورٹی اداروں نے اس کارروائی کو ایک بڑی کامیابی قرار دیا ہے اور کہا ہے کہ عوامی اجتماعات پر حفاظتی اقدامات مزید سخت کر دیے گئے ہیں۔

یاد رہے کہ حالیہ مہینوں میں یورپ میں مختلف مقامات پر بڑے اجتماعات کے دوران دہشت گرد حملوں کے خدشات میں اضافہ ہوا ہے، جس کے باعث سیکیورٹی ادارے ہائی الرٹ پر ہیں۔