اگر اسرائیل نے جنگ بندی نہ کی تو فلسطین کو ریاست تسلیم کرینگے، برطانوی وزیرِاعظم

لندن (ڈیلی اردو) برطانوی وزیرِاعظم سر کیئر سٹارمر نے خبردار کیا ہے کہ اگر اسرائیل نے غزہ میں جنگ بندی، انسانی امداد کی فراہمی، اور دو ریاستی حل پر پیش رفت نہ کی تو برطانیہ آئندہ ستمبر میں اقوامِ متحدہ کی جنرل اسمبلی کے اجلاس کے دوران فلسطین کو بطور آزاد ریاست تسلیم کر لے گا۔

یہ اعلان وزیرِاعظم سٹارمر نے پیر کے روز کابینہ کے ہنگامی اجلاس کے بعد صحافیوں سے گفتگو میں کیا۔ ان کا کہنا تھا کہ “بھوکے فلسطینی بچوں کی تصاویر زندگی بھر ہمارے ساتھ رہیں گی۔”

وزیراعظم آفس کی جانب سے جاری کیے گئے اعلامیے میں کہا گیا ہے کہ اگر اسرائیلی حکومت نے غزہ میں جنگ بندی نہ کی، امداد کی فراہمی کو یقینی نہ بنایا، مقبوضہ مغربی کنارے کو غیرقانونی طور پر ضم کرنے کا عمل بند نہ کیا اور دو ریاستی حل کے لیے سنجیدہ مذاکرات کا آغاز نہ کیا، تو برطانیہ فلسطین کو بطور ریاست تسلیم کرنے میں دیر نہیں کرے گا۔

اسرائیل کا سخت ردِعمل

برطانوی اعلان پر اسرائیلی وزیراعظم بنیامن نیتن یاہو نے شدید ردِعمل دیتے ہوئے سوشل میڈیا پلیٹ فارم ایکس (سابقہ ٹوئٹر) پر کہا کہ:> “سٹارمر حماس جیسے شیطانی دہشت گردوں کو انعام دے رہے ہیں اور ان کے متاثرین کو سزا۔ آج اسرائیل کی سرحد پر ایک جہادی ریاست، کل برطانیہ کے لیے خطرہ بنے گی۔”

سٹارمر کا مؤقف

برطانوی وزیراعظم نے واضح کیا کہ اسرائیل اور حماس میں کوئی برابری نہیں، اور برطانیہ حماس سے مطالبہ کرتا ہے کہ وہ: تمام یرغمالیوں کو فوری طور پر رہا کرے،جنگ بندی معاہدے پر دستخط کرے،  تسلیم کرے کہ وہ غزہ کی حکومت میں کوئی کردار ادا نہیں کرے گی،  اور اپنا اسلحہ ڈال دے۔

سٹارمر نے کہا کہ وہ اقوامِ متحدہ کے اجلاس سے قبل صورتحال کا جائزہ لیں گے اور اگر اسرائیل نے شرائط پوری نہ کیں تو برطانیہ اپنا فیصلہ ستمبر میں کر دے گا۔

عالمی دباؤ اور بدلتی صورتحال

غزہ میں جاری انسانی بحران پر عالمی برادری کا دباؤ اسرائیل پر بڑھ رہا ہے۔ امریکی ڈونلڈ ٹرمپ نے بھی حال ہی میں کہا تھا کہ “غزہ میں حقیقی بھوک ہے، اور یہ معاملہ اب مزید نظرانداز نہیں ہو سکتا۔”

اب تک 140 سے زائد ممالک فلسطینی ریاست کو تسلیم کر چکے ہیں۔ گزشتہ سال اسپین، آئرلینڈ اور ناروے نے اس حوالے سے سفارتی قدم اٹھایا۔ فرانس نے بھی عندیہ دیا ہے کہ وہ اقوام متحدہ کے اجلاس میں فلسطین کو تسلیم کرنے کا اعلان کرے گا۔