ایران جنگ: امریکی فوج کے چیف آف اسٹاف عہدے سے ہٹا دیے گئے

واشنگٹن (ڈیلی اردو/نیوز ایجنسیاں) امریکی محکمہ دفاع پینٹاگون کے ترجمان شان پارنیل نے سوشل میڈیا پلیٹ فارم ایکس پر جاری ایک بیان میں اس پیشرفت کی تصدیق کرتے ہوئے کہا کہ امریکی فوج کے چیف آف اسٹاف، ’’جنرل رینڈی اے جارج فوری طور پر امریکی فوج کے 41ویں چیف آف اسٹاف کے عہدے سے ریٹائر ہو رہے ہیں۔‘‘

تاہم اس کی کوئی وجہ بیان نہیں کی گئی۔ پارنیل نے کہا کہ محکمہ دفاع جنرل جارج کی دہائیوں پر محیط خدمات پر ان کا شکر گزار ہے۔

جنرل جارج صدر ڈونلڈ ٹرمپ کی دوسری مدتِ صدارت کے دوران عہدے سے ہٹائے جانے والے تازہ ترین اعلیٰ فوجی افسر ہیں۔

امریکی فوج کے اس اعلیٰ ترین عہدے سے ان کی برطرفی ایسے وقت میں سامنے آئی ہے، جب امریکہ ایران کے ساتھ جاری جنگ میں مصروف ہے، جس کے بارے میں صدر ٹرمپ اشارہ دے چکے ہیں کہ یہ مزید کئی ہفتوں تک جاری رہ سکتی ہے۔

نام ظاہر نہ کرنے کی شرط پر بات کرنے والے ایک عہدیدار نے امریکی نشریاتی ادارے سی بی ایس کو بتایا کہ امریکی وزیر دفاع پیٹ ہیگستھ چاہتے تھے کہ فوج کی قیادت ایسا شخص کرے، جو ان  کے ساتھ ساتھ صدر ٹرمپ کے فوج سے متعلق وژن کو عملی شکل دے سکے۔

سی بی ایس نیوز کے مطابق اب تک وزیر دفاع ایک درجن سے زیادہ امریکی سینئر فوجی افسران کو ان کے عہدوں سے ہٹا چکے ہیں۔

تقریباً چالیس سال پر محیط فوجی کیریئر کے دوران جنرل جارج کئی بار افغانستان اور عراق میں تعینات رہ چکے ہیں۔ وہ اس سے پہلے صدر جو بائیڈن کی انتظامیہ میں وزیر دفاع لائیڈ آسٹن کے سینئر ملٹری اسسٹنٹ کے طور پر بھی خدمات انجام دے چکے ہیں۔