ایران جنگ بندی پاکستان کی درخواست پر، ایران ایٹمی ہتھیار نہیں رکھ سکتا، امریکی صدر

واشنگٹن (ڈیلی اردو) امریکی صدر ڈونلڈ ٹرمپ نے کہا ہے کہ ایران کے ساتھ جنگ بندی دراصل پاکستان کی درخواست پر بطور “فیور” کی گئی۔

ایئر فورس ون میں صحافیوں سے گفتگو کرتے ہوئے امریکی صدر نے دعویٰ کیا کہ وہ خود اس جنگ بندی کے حق میں نہیں تھے، تاہم دیگر ممالک کی درخواست پر اسے قبول کیا گیا۔ ان کے مطابق اس معاملے میں پاکستان کی قیادت نے کردار ادا کیا۔

ٹرمپ نے پاکستانی قیادت کی تعریف کرتے ہوئے کہا کہ “وہ شاندار لوگ ہیں”۔

انہوں نے ایران کی جانب سے دی گئی جوہری تجاویز کو مسترد کرتے ہوئے کہا کہ ایران کو ایٹمی ہتھیار رکھنے کی اجازت نہیں دی جا سکتی۔ ان کے مطابق 20 سال تک جوہری پروگرام کی معطلی پر انہیں اعتراض نہیں، تاہم یورینیم افزودگی کی ضمانتیں تسلی بخش نہیں۔

چینی صدر شی جن پنگ کے حوالے سے گفتگو کرتے ہوئے ٹرمپ نے کہا کہ چین بھی اس مؤقف کی حمایت کرتا ہے کہ ایران کو جوہری ہتھیار حاصل نہیں کرنے چاہئیں اور آبنائے ہرمز کو کھلا رکھا جانا چاہیے۔

انہوں نے کہا کہ وہ چند دنوں میں ایران سے تیل خریدنے والی چینی کمپنیوں پر عائد پابندیوں پر نظرِ ثانی کر سکتے ہیں۔

ٹرمپ نے مزید بتایا کہ چین امریکہ سے اربوں ڈالر کی سویا بین خریدے گا، جو امریکی کسانوں کے لیے مثبت خبر ہے۔

تائیوان سے متعلق سوال پر امریکی صدر نے کہا کہ ان کی پالیسی میں کوئی تبدیلی نہیں آئی، اور چین کے ساتھ اس معاملے پر کوئی وعدہ نہیں کیا گیا۔ انہوں نے یہ بھی کہا کہ وہ تائیوان کو ہتھیار فراہم کرنے کی منظوری دینے یا نہ دینے پر ابھی فیصلہ نہیں کر رہے۔

چینی صدر سے ملاقات کے بارے میں بات کرتے ہوئے ٹرمپ نے کہا کہ ان کے ساتھ تائیوان اور علاقائی معاملات پر گفتگو ہوئی، تاہم انہیں نہیں لگتا کہ تائیوان پر کوئی فوری تنازع پیدا ہوگا۔

جب ان سے چینی صدر کے بارے میں سوال کیا گیا تو انہوں نے کہا کہ وہ انہیں چین کا صدر سمجھتے ہیں اور ان کی عزت کرتے ہیں۔