ایران جنگ میں خطے کے پڑوسی ممالک کو ہدف بنانے سے باز رہے، حماس

غزہ (ڈیلی اردو) فلسطینی عسکریت پسند تنظیم حماس نے تہران میں ایرانی حکومت سے مطالبہ کیا ہے کہ وہ امریکہ اور اسرائیل کے خلاف اپنی جنگ میں خلیج فارس کے اپنے ہمسایہ ممالک کو ہدف بنانے سے باز رہے۔

ساتھ ہی بین الاقوامی سطح پر امریکہ، اسرائیل اور یورپی یونین کی طرف سے ایک ’دہشت گرد تنظیم‘ قرار دی گئی اس فلسطینی تحریک نے یہ بات بھی زور دے کر کہی کہ ایران کو یہ حق حاصل ہے کہ وہ امریکہ اور اسرائیل کے خلاف اپنا دفاع کر سکے، تاہم اسے خلیجی ممالک پر حملوں سے احتراز کرنا چاہیے۔

حماس کی طرف سے جایی کر دہ ایک بیان میں کہا گیا ہے، ’’اس بات کی توثیق کرتے ہوئے کہ اسلامی جمہوریہ ایران کو اپنے خلاف امریکہ اور اسرائیل کی طرف سے کیے جانے والے جارحانہ حملوں کے حوالے سے بین الاقوامی قوانین کے تحت اور تمام دستیاب ذرائع سے اپنے دفاع کا حق حاصل ہے، حماس تحریک تہران سے مطالبہ کرتی ہے کہ وہ اپنے ہمسایہ خلیجی ممالک پر حملوں سے باز رہے۔‘‘

حماس تحریک نے، جس نے غزہ پٹی کے فلسطینی علاقے میں موجودہ فائر بندی سے پہلے تک دو سال تک اسرائیل کے خلاف جنگ لڑی ہے، بین الاقوامی برادری سے بھی یہ مطالبہ کیا کہ وہ ایران جنگ کو فوری طور پر رکوانے کے لیے ’’مل کر کام‘‘ کرے۔