ایران میں بغاوت کی منصوبہ بندی امریکہ صدر ٹرمپ نے کی، خامنہ ای کا الزام

تہران (ڈیلی اردو) ایران کے سپریم لیڈر آیت اللہ علی خامنہ ای نے کہا ہے کہ وہ ملک کو جنگ کی طرف لے جانے کا کوئی ارادہ نہیں رکھتے، تاہم انہوں نے الزام عائد کیا ہے کہ ایران میں حالیہ منظم ہنگاموں اور بغاوت کی منصوبہ بندی میں امریکی صدر براہِ راست ملوث رہے ہیں۔ ان کے مطابق ان واقعات میں ملوث ملکی اور بین الاقوامی عناصر کو کسی صورت نہیں چھوڑا جائے گا۔

سنیچر کے روز ایک تقریب سے خطاب کرتے ہوئے آیت اللہ خامنہ ای نے کہا،’’میں واضح طور پر کہتا ہوں کہ حالیہ بغاوت کی منصوبہ بندی امریکہ نے کی۔ امریکہ کی جانب سے منظم انداز میں کارروائیاں کی گئیں جن کا مقصد ایران پر غلبہ حاصل کرنا تھا۔‘‘

انہوں نے کہا کہ اسلامی انقلاب کے آغاز سے لے کر آج تک امریکہ ایران پر اپنی بالادستی قائم کرنے میں ناکام رہا ہے، اور اب وہ فوجی، سیاسی اور اقتصادی دباؤ کے ذریعے دوبارہ غلبہ حاصل کرنا چاہتا ہے۔

آیت اللہ خامنہ ای کے مطابق ماضی میں ایران میں ہونے والی بغاوتوں میں عموماً امریکی یا یورپی سیاست دانوں کے دوسرے درجے کے رہنما اور ذرائع ابلاغ مداخلت کرتے رہے ہیں، تاہم حالیہ واقعات کی ایک نمایاں خصوصیت یہ ہے کہ اس بار خود امریکی صدر نے براہِ راست مداخلت کی اور بغاوت کرنے والوں کی حوصلہ افزائی کی۔

انہوں نے کہا کہ یہ معاملہ کسی ایک امریکی صدر تک محدود نہیں بلکہ ایران کے خلاف یہ امریکہ کی مجموعی اور مستقل پالیسی کا حصہ ہے۔

برطانوی خبر رساں ادارے  بی بی سی فارسی کے مطابق آیت اللہ خامنہ ای نے مزید کہا کہ حالیہ ہنگاموں میں املاک کو نذرِ آتش کرنے، نقصان پہنچانے اور بدامنی پھیلانے والے عناصر کو ’’ایرانی عوام‘‘ کے طور پر پیش کیا گیا، جو ایرانی قوم کے خلاف بہتان تراشی کے مترادف ہے۔ 

ان کے بقول ان الزامات کے ٹھوس اور دستاویزی شواہد موجود ہیں، اور اس معاملے میں امریکہ اور صہیونی حکومت دونوں ذمہ دار ہیں۔

آیت اللہ خامنہ ای کا کہنا تھا کہ امریکی اور صہیونی سازش کے خلاف کارروائیوں کے دوران قانون نافذ کرنے والے اداروں اور سکیورٹی اہلکار ہلاک ہوئے، تاہم سکیورٹی فورسز نے دشمن کی سازش کو ناکام بنا دیا۔