ایران میں حکومت مخالف تازہ مظاہرے

تہران (ڈیلی اردو/اے ایف پی) ایران کے مقامی اور کچھ بیرون ممالک میڈیا اداروں نے ہفتے کے روز رپورٹ کیا ہے کہ ایرانی طلبہ نے حالیہ مظاہروں میں مارے جانے والوں کی یاد میں ہونے والی ریلیوں کے دوران حکومت مخالف نعرے لگائے۔

اس دوران ایران کی مذہبی قیادت کے خلاف احتجاج کرنے والے گروہوں کا سامنا حکومت کے حامی گروہوں سے بھی ہوا۔

اے ایف پی کی جانب سے جغرافیائی طور پر تصدیق شدہ ویڈیوز، جو تہران کی معروف انجینئرنگ یونیورسٹی میں ریکارڈ کی گئیں، میں دیکھا جا سکتا ہے کہ ہجوم میں جھگڑے شروع ہو گئے۔

ادھر ایرانی صدر مسعود پزشکیان نے کہا ہے کہ ان کا ملک عالمی طاقتوں کے دباؤ کے سامنے سر نہیں جھکائے گا، جبکہ امریکہ کے ساتھ جوہری مذاکرات جاری ہیں۔

ایران کے صدر نے سرکاری ٹی وی پر براہ راست نشر ہونے والی تقریر میں کہا، ’’عالمی طاقتیں ہمارے سر جھکانے پر مجبور کرنے کے لیے قطار میں کھڑی ہیں، مگر ہم ان تمام مسائل کے باوجود، جو وہ ہمارے لیے پیدا کر رہے ہیں، سر نہیں جھکائیں گے۔‘‘