ایران میں حکومت کی تبدیلی؟ امریکی صدر ٹرمپ نے ‘نئی قیادت’ کی کال دے دی

واشنگٹن (ڈیلی اردو) امریکی صدر ڈونلڈ ٹرمپ نے کہا ہے کہ ایران میں نئی قیادت کی تلاش کا وقت آ گیا ہے۔

یہ بیان ایسے وقت میں سامنے آیا ہے جب ایران میں حکومت کے خاتمے کا مطالبہ کرنے والے ملک گیر احتجاج کمزور پڑتے دکھائی دے رہے ہیں، جبکہ ایرانی حکومت کا دعویٰ ہے کہ حالات مکمل کنٹرول میں ہیں۔

ٹرمپ نے گزشتہ چند روز کے دوران ایران میں فوجی مداخلت کی متعدد دھمکیاں دی ہیں اور گزشتہ منگل کو ایرانی عوام سے احتجاج جاری رکھنے اور اداروں پر قبضہ کرنے کی اپیل بھی کی تھی۔ 

اس موقع پر انہوں نے کہا تھا کہ "مدد آرہی ہے"۔ تاہم اگلے ہی روز انہوں نے اپنا مؤقف بدلتے ہوئے کہا کہ انہیں اطلاع ملی ہے کہ ایران میں ہلاکتیں رک چکی ہیں اور وہ پھانسیاں بھی نہیں دے رہے۔

ایرانی سپریم لیڈر کے بیان پر ٹرمپ کا ردعمل

آج ایرانی سپریم لیڈر نے ایران میں ہونے والی ہلاکتوں اور بدامنی کا ذمہ دار ٹرمپ کو ٹھہرایا۔ اس کے ردعمل میں ٹرمپ نے کہا کہ تہران کے حکمران حکومت چلانے کے لیے جبر اور تشدد پر انحصار کرتے ہیں، جس کی مثال پہلے کبھی نہیں ملتی۔

ٹرمپ نے مزید کہا کہ قیادت کا مطلب احترام ہے، خوف اور موت نہیں۔ اقتدار برقرار رکھنے کے لیے ہزاروں لوگوں کو قتل کرنے کے بجائے حکمرانوں کو ملک کو درست طریقے سے چلانے پر توجہ دینی چاہیے، جیسے وہ امریکہ میں کرتے ہیں۔

امریکی صدر نے کہا کہ ناقص قیادت کی وجہ سے ایران دنیا میں رہنے کے لیے بدترین جگہ بن چکا ہے۔