ایران: پاسدارانِ انقلاب کے ترجمان علی محمد نائینی فضائی حملے میں ہلاک

تہران (ڈیلی اردو) ایرانی پاسدارانِ انقلاب کور (IRGC) نے جمعہ 20 مارچ کو تصدیق کی ہے کہ اس کے ترجمان، جنرل علی محمد نائینی ایک فضائی حملے میں ہلاک ہو گئے ہیں۔ یہ اطلاع IRGC کے میڈیا پلیٹ فارم سپاہ نیوز کے ذریعے جاری کی گئی۔

ایران کے سرکاری ذرائع کے مطابق، جنرل نائینی 2024 سے IRGC کے ترجمان کے طور پر خدمات انجام دے رہے تھے۔ امریکہ یا اسرائیل کی جانب سے فوری طور پر ان کی ہلاکت کی تصدیق نہیں ہوئی۔

نائینی کی ہلاکت خطے میں بڑھتی ہوئی کشیدگی کے تناظر میں ایک اہم پیش رفت ہے۔ حالیہ ہفتوں میں ایران کے خلاف اسرائیل اور امریکہ کی فضائی کارروائیوں میں متعدد اعلیٰ ایرانی عسکری اور سکیورٹی عہدیدار ہلاک ہو چکے ہیں۔ 

ایران کی جانب سے بھی جواباً اسرائیل پر حملوں کے ساتھ ساتھ خلیجی ممالک میں مختلف اہداف، بالخصوص امریکی مفادات، کو نشانہ بنانے کا سلسلہ جاری ہے۔

اسی سلسلے میں، ایرانی پاسدارانِ انقلاب کی بسیج فورس کی انٹیلیجنس ڈویژن کے سربراہ اسماعیل احمدی سمیت کئی اعلیٰ کمانڈرز بھی تہران کے مرکز میں ایک حملے میں ہلاک ہوگئے۔

عالمی سطح پر متعدد ممالک نے ایران کی سپاہِ پاسدارانِ انقلاب (IRGC) کو دہشت گرد قرار دیا ہے۔ امریکہ اور کینیڈا، یورپ میں یورپی یونین کے تمام 27 ممالک کے علاوہ آئس لینڈ، مالدووا، مونٹینیگرو، شمالی مقدونیہ، بوسنیا و ہرزیگووینا، لکسمبرگ، یوکرین، لکٹنسٹائن، البانیہ اور سربیا نے پاسدارانِ انقلاب کو دہشت گرد تنظیم قرار دیا ہے۔

مشرقِ وسطیٰ میں اسرائیل، سعودی عرب اور بحرین نے بھی یہ اقدام کیا ہے، جبکہ دیگر خطوں میں آسٹریلیا، ایکواڈور، پیراگوئے اور سویڈن نے IRGC کو دہشت گرد قرار دیا ہے۔ خاص طور پر ارجنٹائن نے اس تنظیم کی قدس فورس کو دہشت گرد قرار دیا ہے۔