ایران پر امریکی و اسرائیلی حملوں میں تقریباً 1,900 افراد ہلاک

واشنگٹن (ڈیلی اردو)28 فروری کو امریکہ اور اسرائیل کے ایران پر حملوں کے بعد سے مختلف ممالک کے اعداد و شمار کے مطابق مجموعی طور پر کم از کم تقریباً 1,900 سے زائد افراد ہلاک ہو چکے ہیں۔ تاہم ان اعداد و شمار کی آزادانہ تصدیق نہیں ہو سکی۔

ایران کے سرکاری میڈیا کے مطابق ایران میں کم از کم 1,270 افراد ہلاک ہوئے ہیں۔ اقوام متحدہ میں ایران کے سفیر کے مطابق جنگ میں 1,300 سے زیادہ شہری ہلاک ہوئے ہیں، تاہم دونوں اعداد میں فرق کی وجہ واضح نہیں ہے۔

لبنانی حکام کے مطابق لبنان میں اسرائیلی حملوں میں کم از کم 594 افراد ہلاک ہوئے ہیں۔ عالمی ادارہ صحت کے مطابق ہلاک ہونے والوں میں 84 بچے بھی شامل ہیں۔

عراقی پولیس اور محکمہ صحت کے حکام کے مطابق عراق میں بھی حملوں میں کم از کم 16 افراد مارے جا چکے ہیں۔ 

اسرائیل میں اب تک 12 افراد ہلاک ہوئے ہیں۔ ان میں سے نو افراد یکم مارچ کو بیت شیمش نامی شہر میں ایک ایرانی میزائل حملے میں مارے گئے۔ اسرائیلی فوج کے مطابق جنوبی لبنان میں اس کے دو فوجی بھی مارے گئے۔

امریکی فوج کے مطابق ایران کے خلاف کارروائیوں کے دوران تاحال اس کے سات فوجی اہلکار مارے جا چکے ہیں۔

شام کی سرکاری نیوز ایجنسی کے مطابق اس ملک میں چار افراد اس وقت ہلاک ہوئے جب 28 فروری کو ایک ایرانی میزائل جنوبی شامی شہر سویدا میں ایک عمارت کو لگا۔

متحدہ عرب امارات میں ایرانی حملوں میں چھ افراد ہلاک ہوئے ہیں۔

 سعودی عرب کے دارالحکومت ریاض کے جنوب مشرق میں واقع شہر الخرج میں ایک رہائشی علاقے پر ایک گولہ گرنے سے دو افراد ہلاک ہوئے۔

بحرین میں بھی اب تک دو افراد مارے جا چکے ہیں اور اتنے ہی کویت میں بھی، جن میں ایک بچہ بھی شامل ہے۔ اس کے علاوہ ڈیوٹی کے دوران ملکی وزارت داخلہ کے اہلکار اور دو فوجی بھی مارے گئے۔

عمان میں ایک شخص اس وقت ہلاک ہو گیا، جب مسقط کے ساحل کے قریب ایک گولہ ایک آئل ٹینکر کو لگا۔