ایران پر بڑا فضائی حملہ، ہسپتالوں اور ایئرپورٹ کو شدید نقصان، 17 طیارے تباہ

تہران (ڈیلی اردو ) ایرانی سرکاری میڈیا کے مطابق ہفتے کی شب ہونے والے بڑے فضائی حملوں کے نتیجے میں ملک کے مختلف حصوں میں شدید نقصان ہوا ہے، جس میں جنوب مغربی صوبے خوزستان کے دو ہسپتال بھی شامل ہیں۔

سرکاری ٹیلی ویژن کے مطابق اہواز میں واقع رازی میڈیکل سینٹر اور اندیمشک کے امام علی ہسپتال کے قریب دھماکوں سے عمارتوں کو شدید نقصان پہنچا۔

رپورٹس کے مطابق تہران کے مغرب میں واقع مہرآباد ایئرپورٹ کو بھی حملوں میں نشانہ بنایا گیا، جہاں سامنے آنے والی تصاویر میں ایئرپورٹ کے اندر آگ بھڑکتی ہوئی دیکھی جا سکتی ہے۔ تاہم ان اطلاعات کی آزاد ذرائع سے تصدیق نہیں ہو سکی۔

ایرانی میڈیا کے مطابق مہرآباد ایئرپورٹ پر ہونے والے حملوں میں مجموعی طور پر 17 ایرانی طیاروں کی تباہی کی تصدیق کی گئی ہے۔

رپورٹس کے مطابق تہران کے اس مقامی ایئرپورٹ پر آپریشن معطل ہونے کے باعث ایران کے سپریم لیڈر آیت اللہ علی خامنہ ای کی تدفین بھی مؤخر کر دی گئی تھی۔ خامنہ ای، جو ایک ہفتہ قبل اسرائیلی اور امریکی حملوں میں ہلاک ہوئے تھے، کو ان کے آبائی شہر مشہد میں امام رضاؑ کے مزار میں دفن کیا جانا ہے۔

یہ بھی بتایا گیا ہے کہ تہران کے علاوہ وسطی، مغربی اور شمال مغربی ایران میں متعدد فوجی تنصیبات کو رات بھر نشانہ بنایا گیا۔

دوسری جانب اسرائیلی فوج کا کہنا ہے کہ اس کے 80 سے زائد جنگی طیاروں نے ہفتے کے روز تہران اور وسطی ایران میں ایرانی فوجی ٹھکانوں، میزائل لانچروں اور دیگر اہداف پر حملوں کی ایک نئی لہر مکمل کی ہے۔

اسرائیلی فوج کے بیان کے مطابق ان حملوں میں ایرانی پاسدارانِ انقلاب کی ایک فوجی اکیڈمی، ایک زیرِ زمین کمانڈ سینٹر، میزائل ذخیرہ کرنے کے مراکز اور لانچنگ سائٹس کو نشانہ بنایا گیا، تاکہ اسرائیل پر ہونے والی فائرنگ کی صلاحیت کو کم کیا جا سکے۔

یاد رہے کہ 28 فروری کو امریکہ اور اسرائیل کی جانب سے ایران پر بڑے حملوں کے بعد شروع ہونے والی جنگ کے بعد یہ اب تک کے بڑے حملوں میں سے ایک قرار دیا جا رہا ہے۔

اس سے قبل جنگ کے آغاز پر اسرائیلی فوج نے کہا تھا کہ ایران پر ابتدائی حملوں میں 200 جنگی طیاروں نے حصہ لیا تھا، جسے اسرائیلی فضائیہ کی تاریخ کی سب سے بڑی کارروائی قرار دیا گیا تھا۔