ایران کا آبنائے ہرمز بند کرنے کا اعلان، امریکہ کی تردید

تہران/واشنگٹن (ڈیلی اردو/نیوز ایجنسیاں) ایران کے خاتم الانبیا ہیڈ کوارٹر نے ایک بیان میں آبنائے ہرمز کو جہازوں کی آمدورفت کے لیے بند کرنے کا اعلان کیا ہے، جس کے بعد عالمی سطح پر تشویش اور ردعمل میں اضافہ دیکھنے میں آ رہا ہے۔

ایرانی خبر رساں ادارے ارنا کے مطابق بیان میں کہا گیا ہے کہ امریکہ کی جانب سے مبینہ وعدہ خلافی اور جنگ بندی کے معاہدے پر مکمل عمل درآمد نہ ہونے کے باعث آبنائے ہرمز کو دوبارہ بند کرنے کا فیصلہ کیا گیا ہے۔ بیان میں مؤقف اختیار کیا گیا کہ معاہدے کے پہلے پیراگراف پر عمل نہیں کیا گیا۔

خاتم الانبیا ہیڈ کوارٹر کے اعلامیے میں مزید کہا گیا ہے کہ جنوبی لبنان میں جاری کشیدگی، بڑی تعداد میں ہلاکتوں اور نقل مکانی، اور اسرائیلی افواج کے جنوبی لبنان سے انخلا میں ناکامی کے تناظر میں یہ اقدام اٹھایا گیا ہے۔

اعلامیے کے مطابق یہ اقدام “دشمن کی وعدہ خلافی” کے جواب میں پہلا قدم ہے، اور اگر صورتحال برقرار رہی تو مزید اقدامات بھی کیے جا سکتے ہیں۔

تاہم امریکی نائب صدر جے ڈی وینس نے ایران کے اس اعلان کو مسترد کرتے ہوئے کہا ہے کہ آبنائے ہرمز بند ہونے کے کوئی شواہد موجود نہیں ہیں۔ فاکس نیوز سے گفتگو کرتے ہوئے انہوں نے کہا کہ آبنائے ہرمز بدستور کھلی ہے اور تجارتی سرگرمیاں معمول کے مطابق جاری ہیں۔

امریکی سینٹرل کمانڈ (سینٹکام) نے بھی کہا ہے کہ آبنائے ہرمز میں تجارتی جہازوں کی آمدورفت معمول کے مطابق جاری رہی۔ بیان کے مطابق 20 جون کو 55 تجارتی جہازوں نے اس آبی گزرگاہ سے گزر کر بڑی مقدار میں کارگو اور 17 ملین بیرل سے زائد تیل عالمی منڈیوں تک پہنچایا۔

سینٹکام نے مزید کہا کہ امریکی افواج خطے میں نیویگیشن کی آزادی اور بحری راستوں کے تسلسل کو یقینی بنانے کے لیے سرگرم ہیں، اور بین الاقوامی آبی گزرگاہ اب بھی محفوظ طور پر فعال ہے۔

اس سے قبل ایرانی پاسدارانِ انقلاب کی بحریہ نے بھی متنبہ کیا تھا کہ امریکہ اور اسرائیل کی مبینہ جنگ بندی خلاف ورزیوں کے باعث آبنائے ہرمز کو تمام بحری جہازوں کے لیے بند کیا جا سکتا ہے اور اس کے قریب آنے والے جہازوں کی سلامتی کی ذمہ داری نہیں لی جائے گی۔

ماہرین کے مطابق آبنائے ہرمز کی بندش کا اعلان اگر عملی شکل اختیار کرتا ہے تو اس سے عالمی توانائی منڈیوں اور تیل کی ترسیل پر سنگین اثرات مرتب ہو سکتے ہیں، تاہم فی الحال امریکہ اور اس کے اتحادیوں کے مطابق آبی گزرگاہ کھلی اور فعال ہے۔