ایران کا امریکی پائلٹ کی گرفتاری پر بڑا انعام، ایک ریسکیو، دوسرا تاحال لاپتہ

واشنگٹن (ش ح ط) ایران کے سرکاری میڈیا نے دعویٰ کیا ہے کہ جنوب مغربی ایران میں مار گرائے گئے امریکی ایف-15 لڑاکا طیارے کے ایک یا ایک سے زائد پائلٹس نے ایجیکٹ کیا، جس کے بعد مقامی افراد سے ان کی تلاش میں مدد کی اپیل کی گئی ہے۔

ایرانی حکام نے اعلان کیا ہے کہ امریکی پائلٹوں کو پکڑ کر سکیورٹی اداروں کے حوالے کرنے والوں کو نقد انعام دیا جائے گا، جبکہ پولیس، سکیورٹی فورسز اور فوجی دستے بھی تلاش کے لیے متحرک کر دیے گئے ہیں۔

ایرانی سرکاری ٹی وی نے ابتدا میں شہریوں کو سخت ہدایات جاری کیں، تاہم بعد میں مؤقف تبدیل کرتے ہوئے کہا گیا کہ پائلٹس کو زندہ حالت میں حکام کے حوالے کیا جائے۔

ادھر ایرانی صوبے کہگیلویہ و بویراحمد کے ایک عہدیدار کے مطابق لاپتہ پائلٹ کی تلاش “مکمل قوت” کے ساتھ جاری ہے، جبکہ خوزستان اور مذکورہ صوبے میں سرچ آپریشن پر توجہ مرکوز ہے۔

دوسری جانب امریکی حکام کے مطابق ایف-15 کے دو رکنی عملے میں سے ایک پائلٹ کو ریسکیو کر لیا گیا ہے، جبکہ دوسرے کی تلاش جاری ہے۔

ذرائع کے مطابق ریسکیو آپریشن کے دوران ایک اے-10 طیارہ اور دو ہیلی کاپٹر بھی فائرنگ کی زد میں آئے۔ اے-10 طیارے کے پائلٹ نے خلیج کے اوپر ایجیکٹ کیا اور بعد ازاں اسے ریسکیو کر لیا گیا۔

رپورٹس کے مطابق ایک ہیلی کاپٹر، جو ریسکیو کیے گئے پائلٹ کو لے جا رہا تھا، چھوٹے ہتھیاروں کی فائرنگ کا نشانہ بنا، جس کے نتیجے میں عملے کے بعض افراد زخمی ہوئے، تاہم ہیلی کاپٹر نے محفوظ ہنگامی لینڈنگ کی۔

امریکی حکام کا کہنا ہے کہ ایف-15 طیارہ دوپہر کے وقت مار گرایا گیا، جبکہ لاپتہ ویپن سسٹمز آفیسر کی تلاش تاحال جاری ہے۔

وائٹ ہاؤس کے مطابق صدر ڈونلڈ ٹرمپ کو اس واقعے پر بریفنگ دے دی گئی ہے، جبکہ انہوں نے کہا ہے کہ یہ واقعہ ایران کے ساتھ جاری جنگ یا ممکنہ مذاکرات کو متاثر نہیں کرے گا۔