ایران کا خطے میں اقتصادی مراکز اور بینکوں کو ہدف بنانے کا اعلان

تہران (ڈیلی اردو/اے ایف پی) سرکاری میڈیا کے مطابق ایران کی خاتم الانبیاء مشترکہ کمانڈ کے ترجمان ابراہیم ذوالفقاری نے کہا کہ اپنی ناکام مہم کے بعد امریکی فوج اور اسرائیل نے ایران کے ایک بینک کو نشانہ بنایا ہے۔

انہوں نے مزید کہا، ’’اس غیر قانونی اور غیر معمولی اقدام کے ذریعے دشمن ہمیں مجبور کر رہا ہے کہ ہم خطے میں امریکی اور اسرائیلی حکومتوں سے وابستہ اقتصادی مراکز اور بینکوں کو نشانہ بنائیں۔‘‘

ترجمان نے خطے کے لوگوں کو خبردار کیا کہ وہ بینکوں سے دور رہیں۔ انہوں نے مزید کہا کہ ایران بدھ 11 مارچ کے روز خطے میں امریکہ اور اسرائیل سے جڑے اقتصادی اور بینکاری مفادات کو اپنے حملوں کا ہدف بنائے گا۔

اسی دوران ایرانی فوج سے وابستہ ایک میڈیا ادارے نے ملکی مسلح افواج کے ترجمان ابوالفضل شکارچی کے حوالے سے کہا ہے کہ ایران ان حالیہ امریکی اور اسرائیلی حملوں کا بھی جواب دے گا، جو رہائشی علاقوں پر کیے گئے۔

شکارچی نے امریکہ اور اسرائیل پر الزام لگایا کہ وہ شہریوں کو ’’انسانی ڈھال‘‘ کے طور پر استعمال کر رہے ہیں۔

ادھر خبر رساں ادارے اے ایف پی کے مطابق اس کے صحافیوں نے منگل اور بدھ کی درمیانی رات یروشلم میں فضائی حملے کے سائرن بجنے اور دور دھماکوں کی آوازیں سنیں۔

دریں اثنا لبنان کے مشرقی علاقے کے ایک قصبے پر بدھ کے روز اسرائیلی فضائی حملے میں سات افراد ہلاک اور 18 دیگر زخمی ہو گئے۔ یہ بات لبنانی وزارت صحت نے بتائی۔ لبنان میں جنگ اپنے دسویں دن میں داخل ہوگئی ہے۔