ایران کا کویت اور متحدہ عرب امارات میں امریکی اڈوں پر میزائل و ڈرون حملوں کا دعویٰ

تہران(ڈیلی اردو) ایران اور امریکا کے درمیان جاری کشیدگی کے دوران ایرانی فوج نے کویت اور متحدہ عرب امارات میں امریکی فوجی تنصیبات کو میزائلوں اور ڈرونز سے نشانہ بنانے کا دعویٰ کیا ہے۔

ایرانی فوج کے مطابق کارروائی میں کویت کے احمد الجابر فضائی اڈے اور متحدہ عرب امارات کے المنہاد فضائی اڈے کو ہدف بنایا گیا۔ ایرانی حکام کا کہنا ہے کہ حملوں میں امریکی مواصلاتی نظام، لڑاکا طیاروں کے ہینگرز، فوجی اہلکاروں کی تعیناتی سے متعلق مقامات اور ریڈار تنصیبات کو نشانہ بنایا گیا۔

ایرانی خبر رساں ادارے کے مطابق یہ کارروائی ’’صاعقہ‘‘ نامی آپریشن کی 31ویں لہر کا حصہ تھی اور اسے جنوبی ایران میں امریکی حملوں کے جواب میں کیا گیا۔ تاہم ان حملوں سے امریکی تنصیبات کو پہنچنے والے نقصان کی آزادانہ طور پر تصدیق نہیں ہوسکی۔

ایرانی فوج نے احمد الجابر ایئر بیس کو خطے میں امریکی فضائی سرگرمیوں اور نگرانی کے لیے اہم مرکز قرار دیا، جبکہ المنہاد ایئر بیس کو غیر ملکی فوجی طیاروں کی معاونت اور نقل و حمل کے حوالے سے اہم تنصیب قرار دیا۔

دوسری جانب کویت کی وزارت خارجہ نے اپنی سرزمین پر ایرانی حملے کی شدید مذمت کرتے ہوئے اسے ملکی خودمختاری اور سلامتی کے لیے خطرہ قرار دیا ہے۔ کویتی حکام کے مطابق ایسے حملوں سے خطے میں کشیدگی مزید بڑھنے اور سفارتی سطح پر جاری کشیدگی کم کرنے کی کوششوں کو نقصان پہنچنے کا خدشہ ہے۔

ایرانی حکام نے اپنے حملوں کا جواز جنوبی ایران میں ہونے والی امریکی کارروائیوں کو قرار دیا ہے۔ ایرانی فوج کے مطابق حالیہ امریکی حملوں میں بحریہ کے 6 اہلکار ہلاک ہوئے ہیں۔

ایرانی وزارت صحت کے مطابق 30 اگست سے جاری امریکی حملوں میں اب تک 18 افراد ہلاک اور 140 سے زائد زخمی ہوئے ہیں، جن میں خواتین اور بچے بھی شامل ہیں۔ ان اعداد و شمار کی آزادانہ طور پر تصدیق نہیں ہوسکی۔

ایرانی سرکاری میڈیا نے جنوبی ایران کے شہر کوہستک میں ایک شادی کی تقریب کے دوران رہائشی مکان کو نشانہ بنائے جانے کی بھی اطلاع دی ہے۔ رپورٹ کے مطابق واقعے میں 5 شہری ہلاک ہوئے، جن میں 4 سالہ بچہ بھی شامل تھا، جبکہ 70 سے زائد افراد زخمی ہوئے۔

ایرانی ذرائع نے دعویٰ کیا ہے کہ جائے وقوعہ سے ملنے والا ملبہ امریکی ساختہ اے جی ایم 154 جوائنٹ اسٹینڈ آف ویپن سے متعلق ہوسکتا ہے۔ تاہم امریکی فوج نے شہریوں کو جان بوجھ کر نشانہ بنانے کی تردید کی ہے۔

ایرانی نیم سرکاری میڈیا کے مطابق حالیہ امریکی حملوں میں فضائیہ کے 3 پائلٹ بھی ہلاک ہوئے ہیں۔ صوبہ خوزستان کے شہر آغاجاری میں بھی 6 افراد کی نماز جنازہ ادا کیے جانے کی اطلاع دی گئی ہے، جو ایک اور میزائل حملے میں ہلاک ہوئے تھے۔