ایران یورینیئم کی افزودگی سے دستبردار نہیں ہوگا، عباس عراقچی

مسقط (ڈیلی اردو) ایرانی وزیرِ خارجہ عباس عراقچی نے اتوار کے روز واضح کیا ہے کہ تہران یورینیئم کی افزودگی سے دستبردار نہیں ہوگا اور نہ ہی وہ امریکہ کی جانب سے جنگ کی دھمکیوں سے مرعوب ہوگا۔

تہران میں منعقدہ ایک فورم سے خطاب کرتے ہوئے عباس عراقچی نے کہا کہ ایران کو واشنگٹن پر زیادہ اعتماد نہیں ہے اور اسے خدشہ ہے کہ امریکہ تازہ مذاکرات کو سنجیدگی سے نہیں لے رہا۔

امریکی بحری بیڑے یو ایس ایس ابراہم لنکن کی بحیرۂ عرب میں آمد کا حوالہ دیتے ہوئے انہوں نے کہا:“خطے میں ان کی فوجی نقل و حرکت ہمیں خوفزدہ نہیں کر سکتی۔”

عباس عراقچی نے مزید کہا کہ ایران کی کوشش ہے کہ امریکہ کی جانب سے عائد اقتصادی پابندیاں ختم کی جائیں، جس کے بدلے تہران جوہری پروگرام سے متعلق “اعتماد سازی کے متعدد اقدامات” پر غور کر سکتا ہے۔

مسقط میں ہونے والی بات چیت میں امریکہ کی نمائندگی خصوصی ایلچی اسٹیو وِٹکوف کر رہے ہیں، جبکہ صدر ڈونلڈ ٹرمپ کے داماد اور قریبی مشیر جیرڈ کشنر بھی امریکی وفد میں شامل ہیں۔

واضح رہے کہ امریکہ اور ایران نے کئی برسوں بعد جمعے کے روز عمان میں مذاکرات کا دوبارہ آغاز کیا ہے۔ مغربی ممالک اور اسرائیل، جسے مشرقِ وسطیٰ کی واحد ایٹمی طاقت تصور کیا جاتا ہے، کا مؤقف ہے کہ ایران جوہری ہتھیار بنانے کی کوشش کر رہا ہے، تاہم ایران ان الزامات کی سختی سے تردید کرتا ہے۔