ایف آئی اے کی کامیاب کارروائی، بھیس بدل کر گوجرانوالہ میں رہائش پذیر بھارتی گرفتار

گوجرانوالہ (مانیٹرنگ ڈیسک) وفاقی تحقیقاتی ادارے (ایف آئی اے) نے جعلی دستاویزات پر رہائش پذیر بھارتی شہری کو گرفتار کرنے کا دعویٰ کیا ہے۔

میڈیا رپورٹس مطابق مذکورہ شخص 10 سال سے گوجرانوالہ میں رہائش پذیر تھا جس کو پناہ فراہم کرنے والے شہری کے خلاف بھی مقدمہ درج کرلیا گیا۔

ایف آئی اے کے ڈپٹی ڈائریکٹر عامر نواز نے صحافیوں کو بتایا کہ پنجم تیواری نامی شخص 2009 میں ملازمت کے سلسلے میں دبئی گیا تھا جہاں اس کی ملاقات گوجرانوالہ سے تعلق رکھنے والے شہری کامران سے ہوئی۔جس کے بعد دونوں کاروباری شراکت دار بن گئے تھے اور کامران، پنجم تیواری کو جعلی پاسپورٹ پر پاکستان لے آیا تھا۔

بعد ازاں پنجم تیواری نے اسلام قبول کر کے بلال نام اختیار کیا اور کامران کی بہن رخسانہ کے ساتھ اس کی شادی کردی گئی تھی۔

ایف آئی اے عہدیدار کا مزید کہنا تھا کہ مذکورہ شخص نے جعلی پیدائشی سرٹیفکیٹ، قومی شناختی کارڈ اور نکاح نامہ وغیرہ بنوا کر پاکستان میں ہی رہائش اختیار کرلی تھی۔

ایف آئی اے کے اسسٹنٹ ڈائریکٹر عامر سندھو کے ساتھ انسپکٹر نوید احمد، سب انسپکٹر شاہزیب، نے مومن آباد میں موجود مکان پر چھاپہ مار کر پنجم کو گرفتار کیا جبکہ کامران کے خلاف بھی مقدمہ درج کر کے نامعلوم مقام پر منتقل کردیا گیا ہے۔ ملزم سے اہم انکشافات متوقع ہیں۔