’’ایک ہزار میزائل لاک اور لوڈ ہیں، حملہ ہوا تو ایران کو تباہ کر دینگے‘‘، امریکی صدر ٹرمپ

واشنگٹن (نمائندہ م ڈیلی اردو)  امریکی صدر ڈونلڈ ٹرمپ نے جمعہ کے روز ایران کو سخت انتباہ دیتے ہوئے کہا ہے کہ اگر ایرانی حکومت نے امریکی صدر کے قتل یا قتل کی کوشش کی تو امریکہ فوری اور فیصلہ کن فوجی کارروائی کرے گا۔

سوشل میڈیا پر جاری اپنے بیان میں ٹرمپ نے کہا کہ “ایک ہزار میزائل پہلے ہی اپنے اہداف پر لاک اور لوڈ کیے جا چکے ہیں، جبکہ ہزاروں مزید میزائل فوری طور پر داغے جا سکتے ہیں، اگر ایران اپنی دھمکی پر عمل کرتا ہے۔”

انہوں نے کہا کہ اس حوالے سے ضروری احکامات پہلے ہی جاری کیے جا چکے ہیں اور امریکی فوج ایک سال تک، اور ضرورت پڑنے پر اس سے بھی زیادہ عرصے تک، ایران کے مختلف علاقوں کو مکمل طور پر تباہ کرنے کی صلاحیت اور تیاری رکھتی ہے۔

ٹرمپ نے اپنے بیان میں کہا کہ اگر ایران نے امریکی صدر کو نشانہ بنانے کی کوئی کوشش کی تو امریکہ بھرپور جواب دے گا۔ انہوں نے بیان کے اختتام پر "Praise Be to Allah" کے الفاظ بھی تحریر کیے۔

ایران کی جانب سے تاحال ٹرمپ کے اس بیان پر کوئی باضابطہ ردعمل سامنے نہیں آیا ہے۔

یہ بیان ایسے وقت میں سامنے آیا ہے جب امریکہ اور ایران کے درمیان کشیدگی بدستور برقرار ہے اور دونوں ممالک کے درمیان سفارتی اور سکیورٹی معاملات پر غیر یقینی صورتحال پائی جاتی ہے۔