باجوڑ اور بنوں میں لرزہ خیز واقعات میں چار نوجوان ہلاک

خار/بنوں (نمائندگان ڈیلی اردو) پاکستان کے شورش زدہ صوبے خیبر پختونخوا کے اضلاع باجوڑ اور بنوں میں علیحدہ واقعات میں چار افراد ہلاک ہو گئے ہیں۔

باجوڑ: اغوا کے بعد 2 نوجوانوں کی لاشیں برآمد

سرکاری ذرائع کے مطابق باجوڑ کی تحصیل سلارزئی کے علاقے ملا سید خزہ کے پہاڑی سلسلے میں گزشتہ روز نامعلوم شرپسندوں نے دو نوجوانوں کو اغوا کیا تھا۔

مقامی انتظامیہ کے مطابق دونوں نوجوان ہلاک کیے جانے کے بعد ان کی مسخ شدہ نعشیں ایک گہری کھائی سے برآمد ہوئیں۔

واقعے کے بعد علاقے میں شدید خوف و ہراس پھیل گیا جبکہ مقامی آبادی میں غم و غصے کی لہر دوڑ گئی ہے۔

بنوں: فائرنگ کے واقعے میں دو نوجوان ہلاک

بنوں میں بھی نامعلوم ملزمان کی فائرنگ سے دو نوجوان ہلاک ہو گئے۔ پولیس کے مطابق واقعہ نالہ کاشو پل کے قریب پیش آیا جہاں دونوں نوجوان گائے کی تلاش میں گئے تھے۔

ہلاک ہونے والوں کی شناخت کرامت اللہ اور محمود کے ناموں سے ہوئی ہے۔

نعشیں ملنے کی اطلاع پر پولیس اور مقامی لوگ بڑی تعداد میں جائے وقوعہ پر پہنچ گئے۔

پولیس نے دونوں واقعات کی تحقیقات شروع کر دی ہیں جبکہ ابھی تک کسی گروہ نے ذمہ داری قبول نہیں کی۔