باجوڑ، مہمند میں دہشت گردی اور سرحدی کشیدگی کے واقعات، ایک فوجی ہلاک

خار + غلنئی (نمائندگان ڈیلی اردو) پاکستان کے شورش زدہ صوبے خیبر پختونخوا کے قبائلی اضلاع باجوڑ، مہمند میں دہشت گردی اور سرحدی کشیدگی کے واقعات رپورٹ ہوئے ہیں۔

باجوڑ میں فوجی جوان ہلاک

ضلع باجوڑ کے علاقے توگٹ پوسٹ پر دہشت گردوں نے حملہ کیا۔ حملے کے دوران پاک فوج کے جوان لانس نائیک غلام رسول ہلاک ہوگئے۔ غلام رسول کا تعلق خیبر پختونخوا کے ضلع ٹانک کے گاؤں سوراڑھ سے تھا۔ علاقے میں سرچ آپریشن جاری ہے۔

مہمند: پاک افغان سرحد پر فائرنگ

ضلع مہمند کے سرحدی علاقے میں افغان طالبان نے دولت پوسٹ سے پاکستانی سکیورٹی فورسز کی چوکی پر چھوٹے ہتھیاروں سے فائرنگ کی۔ جوابی کارروائی میں افغان طالبان کے دو جنگجو زخمی ہوئے۔

باجوڑ: تخریب کاری کا منصوبہ ناکام

باجوڑ کے مختلف مقامات سے بم ڈسپوزل اسکواڈ نے چھ مارٹر گولے برآمد کرکے انہیں کامیابی سے ناکارہ بنا دیا۔ پولیس کے مطابق کارروائی کے دوران کوئی جانی یا مالی نقصان نہیں ہوا۔

ضلعی پولیس ترجمان نے عوام سے اپیل کی کہ کسی بھی مشکوک چیز یا گولے کو ہرگز ہاتھ نہ لگایا جائے اور فوری طور پر متعلقہ اداروں کو اطلاع دی جائے۔