بلوچستان آپریشن میں زخمی لیفٹیننٹ کرنل خالد حسین کی نمازِ جنازہ چکلالہ گیریژن میں ادا

اسلام آباد (ڈیلی اردو) بلوچستان میں دہشت گردوں کے خلاف آپریشن کے دوران زخمی ہونے والے لیفٹیننٹ کرنل خالد حسین کی نمازِ جنازہ چکلالہ گیریژن راولپنڈی میں ادا کر دی گئی۔

25 فروری 2026 کو پاکستان کے شورش زدہ صوبہ بلوچستان میں پاک افغان سرحد کے ژوب سمبازہ سیکٹر میں دہشت گردوں کے ساتھ جھڑپ کے دوران لیفٹیننٹ کرنل خالد حسین شدید زخمی ہوئے تھے، جو بعد ازاں سی ایم ایچ کوئٹہ میں دورانِ علاج دم توڑ گئے۔

ان کی نمازِ جنازہ پہلے کوئٹہ میں ادا کی گئی، جس کے بعد چکلالہ گیریژن راولپنڈی میں بھی نمازِ جنازہ ادا کی گئی۔ نمازِ جنازہ میں وزیراعظم شہباز شریف، فیلڈ مارشل عاصم منیر سمیت اعلیٰ سول و عسکری قیادت نے شرکت کی۔

آئی ایس پی آر کے مطابق وزیر داخلہ، سینئر حاضر سروس و ریٹائرڈ فوجی افسران، اہل خانہ اور شہریوں کی بڑی تعداد نے بھی نمازِ جنازہ میں شرکت کی۔

آئی ایس پی آر کے مطابق لیفٹیننٹ کرنل خالد حسین گزشتہ روز بلوچستان میں دہشت گردوں کے خلاف آپریشن کے دوران زخمی ہوئے تھے۔

وزیراعظم نے لیفٹیننٹ کرنل خالد حسین کو خراجِ عقیدت پیش کرتے ہوئے ان کی جرات، فرض شناسی اور وطن کے دفاع کے لیے عزم کو سراہا۔ انہوں نے کہا کہ پاک فوج دہشت گردوں اور ان کے سہولت کاروں کے خاتمے کے لیے پرعزم ہے۔

وزیراعظم کے مطابق شہداء کی قربانیاں ملک کے امن، استحکام اور خودمختاری کے تحفظ کے عزم کو مزید مضبوط کرتی ہیں۔

آئی ایس پی آر کے مطابق لیفٹیننٹ کرنل خالد حسین کو مکمل فوجی اعزاز کے ساتھ ان کے آبائی علاقے میں سپرد خاک کیا جائے گا، جبکہ مسلح افواج اور قوم نے ان کے اہل خانہ سے اظہارِ تعزیت اور ہمدردی کیا ہے۔