بلوچستان: بولان میں نامعلوم مسلح افراد کی فائرنگ سے تین افراد ہلاک

کوئٹہ (ڈیلی اردو) صوبہ بلوچستان کے ضلع بولان کے علاقے پنجرہ پل کے قریب نامعلوم مسلح افراد نے 3 افراد کو فائرنگ کرکے ہلاک کردیا۔

لیویز حکام کے مطابق گذشتہ شب مچھ میں دہشت گردوں کے حملے کے دوران کولپور، گوکرت اور پنجرہ پل کے قریب بھی فائرنگ کے واقعات رونما ہوئے۔

لیویز حکام کے مطابق نامعلوم مسلح افراد نے گوکرت کے قریب پنجرہ پل کے قریب تین افراد کو گولیاں مار کر ہلاک کردیا، تینوں افراد کی لاشوں کی موجودگی کی اطلاع پر لیویز نے موقع پر پہنچ کر لاشوں کو سول ہسپتال ڈھاڈر منتقل کردیا۔

ایم ایس سول ہسپتال ڈھاڈر ڈاکٹر سیف اللّٰہ کے مطابق ایک شخص کی شناخت ڈیرہ غازی خان کے رہائشی عبدالمجید کے نام سے ہوئی ہے تاہم دو افراد کی شناخت نہیں ہوسکی ہے۔