بلوچستان: جھڑپ میں 6 مبینہ دہشت گرد اور ایک سیکیورٹی اہلکار ہلاک

راولپنڈی (کاشف محمود) پاکستان کے صوبہ بلوچستان کے ضلع کیچ میں سیکیورٹی فورسز اور دہشت گردوں کے درمیان فائرنگ کے نتیجے میں چھ مبینہ دہشت گرد اور ایک سیکیورٹی اہلکار ہلاک ہو گیا ہے۔

ہفتے کو پاکستانی فوج کے شعبہ تعلقات عامہ (آئی ایس پی آر) کا ایک بیان میں کہنا تھا کہ جمعہ کو شمالی کیچ کے علاقے ہوشاب میں سیکیورٹی فورسز نے مخبروں کی اطلاع پر مشتبہ دہشت گردوں کے خلاف کارروائی کی۔ جس کے جواب میں دہشت گردوں کی طرف سے بھی فائرنگ شروع کر دی گئی۔ فائرنگ کے تبادلے میں ایک سیکیورٹی اہلکار ہلاک اور ایک زخمی ہو گیا۔

بیان کے مطابق جب سیکیورٹی فورسز کے اہلکاروں نے علاقے کو گھیرے میں لیا تو دہشت گردوں نے علاقے سے فرار ہونے کی کوشش کی اور سیکیورٹی فورسز پر فائرنگ شروع کردی۔

سیکیورٹی فورسز سے فائرنگ کے تبادلے میں چھ دہشت گرد مارے گئے۔

آئی ایس پی آر کا کہنا تھا کہ دہشت گردوں سے فائرنگ کے تبادلے میں حوالدار ہدایت اللہ ہلاک ہوئے جب کہ ایک اہلکار زخمی بھی ہوا۔

آپریشن میں ہلاک ہونے والے حوالدار ہدایت اللہ کا تعلق خیبر پختونخوا کے ضلع لکی مروت سے ہے۔ جبکہ زخمی میر محمد کا قبائلی ضلع شمالی وزیرستان سے ہے۔

ہلاک ہونے والے دہشت گردوں کے قبضے سے بھاری مقدار میں اسلحہ و گولا بارود برآمد ہوا۔

کارروائی کے بعد علاقے میں سیکیورٹی سخت کردی گئی ہے جب کہ مبینہ دہشت گردوں کے ساتھیوں کی گرفتاری کی کوششیں جاری ہیں۔