بلوچستان: خاران میں سی ٹی ڈی کی کارروائی، 4 مبینہ علیحدگی پسند ہلاک

کوئٹہ (ڈیلی اردو) بلوچستان کے ضلع خاران میں کاؤنٹر ٹیررازم ڈیپارٹمنٹ (سی ٹی ڈی) نے بلوچ علیحدگی پسندوں کے خلاف کارروائی کرتے ہوئے 4 عسکریت پسندوں کو ہلاک کردیا۔

حساس ادارے اور سی ٹی ڈی نے خاران کے علاقے گواش سوربڈو میں علیحدگی پسندوں کے کیمپ کا سراغ لگانے کے بعد خاران کے علاقے زیریں جنگل میں عسکریت پسندوں کے خلاف آپریشن کیا۔

سی ٹی ڈی کے مطابق کاؤنٹر ٹیررازم ڈیپارٹمنٹ نے حساس ادارے کی اطلاع پر کارروائی کی، 6 گھنٹے تک جاری رہنے والے شدید فائرنگ کے تبادلے میں 4 عسکریت پسند مارے گئے۔

عسکریت پسندوں کے قبضے سے خطرناک اسلحہ، گولہ بارود اور دھماکہ خیز مواد بھی برآمد ہوا جبکہ عسکریت پسندوں کا تعلق علیحدگی پسند کالعدم تنظیم بلوچ لبریشن آرمی (بی ایل اے) سے تھا۔

ہلاک ہونے والے عسکریت پسند نوشکی اور پنجگور ایف سی کیمپوں پر ہونے والے حملوں اور بم دھماکوں میں ملوث تھے۔

ہلاک عسکریت پسندوں کی شناخت سلال احمد، شکر اللہ، وسیم سجاد اور فرید کے نام سے ہوئی۔

سی ٹی ڈی ترجمان نے کہا کہ اشفاق اور اس کے 2 ساتھی، سلال احمد اور فرید 2 فروری کو نوشکی کے ایف سی کیمپ پر ہونے والے حملوں میں ملوث تھے۔

ترجمان کے مطابق ہلاک عسکریت پسندوں سے 10 دستی بم، 20 مارٹر گولے، 3 سب مشین، 15 کلو گرام دھماکہ خیز مواد، 10 دھماکہ خیز مواد (ڈیٹونیٹرز)، ایک 9 ایم ایم پستول، ایک مارٹر گَن اور ایک ریموٹ کنٹرول ڈیوائس برآمد ہوئے۔

عسکریت پسند فورسز اور اعلی سول شخصیات کو نشانہ بنانے کے لئے کیمپ قائم کررکھا تھا جہاں سے وہ نوشکی، پنجگور اور خاران کے گردونواح کے علاقوں میں اعلیٰ عسکری، سول اور معروف شخصیات کی ٹارگٹ کلنگ اور بم حملوں کی منصوبہ بندی کرتے اور کاروائیاں کرتے تھے۔

خاران میں پولیس اور شہریوں کی ٹارگٹ کلنگ بھی یہی گروپ کرتا رہا ہے۔

واضع رہے کہ سابق چیف جسٹس بلوچستان جسٹس محمد نور مسکان زئی کو بھی 3 روز قبل اسی علاقے میں فاٰئرنگ کرکے ہلاک کردیا گیا تھا۔