بلوچستان: قلعہ عبد اللہ میں ایف سی کیمپ پر خودکش کار بم حملہ، 2 اہلکار ہلاک، 11 زخمی

واشنگٹن (ش ح ط) پاکستان اور افغانستان کی سرحد کے قریبی ضلع قلعہ عبداللہ میں طالبان نے فرنٹئیر کور (ایف سی) کے گلستان کیمپ پر خودکش کار بم حملے کے نتیجے میں دو اہلکار ہلاک جبکہ گیارہ زخمی ہوگئے۔

ڈیلی اردو کے مطابق 26 جنوری کی شب ضلع قلعہ عبد اللہ میں ایف سی کے ایک کیمپ پر پاکستانی طالبان نے حملہ کیا ہے۔

سرکاری حکام نے اس حملے کی تصدیق کرتے ہوئے بتایا کہ رات گئے تک سکیورٹی فورسز اور حملہ آوروں کے درمیان فائرنگ کا سلسلہ جاری رہا لیکن تا حال سرکاری سطح پر کسی نقصان کی تصدیق نہیں کی گئی ہے۔

تاہم سرکاری حکام نے بتایا کہ سکیورٹی فورسز کی جوابی کارروائی میں پانچ حملہ آور مارے گئے۔

مقامی ذرائع کے مطابق دھماکے کے بعد شدید فائرنگ کی آوازیں سنائی دیں۔

پاکستانی فوج نے 28 جنوری کو اپنے جاری کردہ بیان میں کہا ہے کہ شدت پسندوں نے قلعے کے اندر داخل ہونے کی کوشش جسے سکیورٹی فورسز نے ناکام بنایا جس پر شدت پسندوں نے پوسٹ کے دیوار سے بارود سے بھری گاڑی کو ٹکرا دیا۔

سکیورٹی فورسز نے جوابی کاروائی کرتے ہوئے دو خودکش حملہ آوروں سمیت 5 شدت پسندوں کو ہلاک کیا جبکہ حملے میں 2 اہلکار بھی مارے گئے.

دوسری جانب کالعدم تنظیم تحریک طالبان پاکستان نے حملے کی ذمہ داری قبول کرلی۔

کالعدم ٹی ٹی پی کا کہنا ہے ‎قلعہ عبد اللہ میں ایف سی کے ایک مرکز پر حملہ کیا ہے اور دیگر مجاہدین کیمپ کے اندر داخل ہو گئے ہیں۔

کالعدم تحریک طالبان پاکستان کا مزید کہنا ہے کہ فوجی کیمپ پر ہونے والے حملے میں خودکش بمباروں نے بھی حصلہ لیا۔

تنظیم کے مطابق یہ حملہ ٹی ٹی پی کے اہم کمانڈر عزیر الرحمٰن عرف قاری اسمٰعیل کی ہلاکت اور مہمند میں ڈرون حملے کا انتقام لینے کے لیے کیا گیا۔

واضح رہے کہ دو روز قبل ٹی ٹی پی کے شیڈو گورنر عزیر الرحمٰن عرف قاری اسمٰعیل قبائلی ضلع خیبر کی دور افتادہ وادی تیراہ کے علاقے باغ میں پاکستانی فوج کے آپریشن میں تین ساتھیوں سمیت ہلاک ہو گئے تھے۔

قاری اسماعیل خالد خراسانی کا قریبی ساتھی تھا، پاکستانی طالبان نے قاری اسمٰعیل کو حال ہی میں ضلع خیبر کا شیڈو گورنر (ولی) نامزد کیا تھا۔