بلوچستان: مستونگ میں سکیورٹی فورسز کے قافلے پر حملہ، 8 اہلکار ہلاک، متعدد زخمی

واشنگٹن (ش ح ط) پاکستان کے شورش زدہ صوبہ بلوچستان کے ضلع مستونگ میں سکیورٹی فورسز کے ایک قافلے پر دہشت گردوں کے حملے میں کم از کم آٹھ اہلکار ہلاک جبکہ متعدد زخمی ہو گئے۔ واقعہ جمعرات کو کوئٹہ-کراچی قومی شاہراہ پر کھڈکوچہ کے علاقے گُرو میں پیش آیا۔

سرکاری ذرائع نے ڈیلی اردو کو بتایا کہ حملہ کالعدم بلوچ لبریشن آرمی (بی ایل اے) سے تعلق رکھنے والے مسلح دہشت گردوں نے اس وقت کیا جب ایک فوجی قافلہ علاقے سے گزر رہا تھا۔ ذرائع کے مطابق قافلے میں ایک درجن سے زائد بسیں اور سکیورٹی پر مامور گاڑیاں شامل تھیں، جن میں پنجگور رائفلز، مکران اسکاوٹس اور دشت اسکاوٹس کے اہلکار سوار تھے۔

ذرائع کا کہنا ہے کہ حملے کے نتیجے میں ایک بس کو شدید نقصان پہنچا جبکہ کم از کم آٹھ اہلکار ہلاک اور متعدد زخمی ہوئے۔ ہلاک ہونے والوں کی شناخت سپاہی مظہر عباس، سپاہی نعمت اللہ، سپاہی نعمت خان، سپاہی ہارون، نائیک عابد، صوبیدار جیند، صوبیدار حیدر اور سپاہی صابر کے ناموں سے ہوئی۔

سرکاری ذرائع کے مطابق قافلے میں شامل اہلکار چھٹی پر اپنے آبائی علاقوں کو جا رہے تھے کہ گُرو کے مقام پر دہشت گردوں نے گھات لگا کر حملہ کر دیا۔

حملے کے بعد کوئٹہ-کراچی شاہراہ پر تین سے چار گھنٹے تک ٹریفک معطل رہی، جبکہ علاقے میں سکیورٹی فورسز کی بھاری نفری تعینات کر دی گئی۔ عینی شاہدین کے مطابق واقعے کے کچھ ہی دیر بعد فوجی ہیلی کاپٹر بھی علاقے میں پرواز کرتے دیکھے گئے۔

ذرائع نے بتایا کہ ہلاک اہلکاروں کی لاشیں اور زخمیوں کو کمبائنڈ ملٹری ہسپتال (سی ایم ایچ) کوئٹہ منتقل کر دیا گیا ہے، جہاں زخمیوں کو طبی امداد فراہم کی جا رہی ہے۔

کالعدم بلوچ لبریشن آرمی (بی ایل اے) نے حملے کی ذمہ داری قبول کرنے کا دعویٰ کیا ہے، تاہم اس دعوے کی آزاد ذرائع سے تصدیق نہیں ہو سکی۔

تاحال حکومت پاکستان اور پاک فوج کے شعبہ تعلقات عامہ (آئی ایس پی آر) کی جانب سے حملے اور جانی نقصان کے حوالے سے کوئی باضابطہ بیان جاری نہیں کیا گیا۔