بلوچستان: مسلح حملوں میں 2 سیکیورٹی اہلکار ہلاک، ایک زخمی

کوئٹہ (ڈیلی اردو)پاکستان کے صوبے بلوچستان میں مسلح حملوں میں 2 سیکیورٹی اہلکار ہلاک اور ایک زخمی ہوگیا۔

رپورٹس کے مطابق پہلے واقعے میں نانا صاحب زیارت، گمباز کے قریب مسلح افراد نے ایک گاڑی پر فائرنگ کی، جس کے نتیجے میں ایک سیکیورٹی اہلکار ہلاک اور دوسرا زخمی ہوگیا۔

لیویز حکام کے مطابق ہلاک ہونے والے کی شناخت مرحبا خان کے نام سے ہوئی، جب کہ زخمی کی شناخت ادریس خان کے نام سے ہوئی ہے۔

حکام کے مطابق ایک اور واقعے میں فرنٹیئر کور (ایف سی) کے سپاہی عبدالحکیم اشائیزئی کو چمن میں گولی مار کر ہلاک کر دیا گیا۔

حکام کے مطابق چمن ماسٹر پلان سائٹ پر موٹر سائیکل سوار حملہ آوروں نے ان پر اندھا دھند فائرنگ کی جس کے نتیجے میں وہ شدید زخمی ہوگئے، تاہم بعد ازاں ہسپتال میں دوران علاج چل بسے۔

پولیس حکام نے میت کو چمن کے ڈسٹرکٹ ہیڈ کوارٹرز ہسپتال منتقل کردیا، حکام نے اس بات کی تصدیق کی ہے کہ اہلکار کو متعدد گولیاں لگی ہیں جس کے نتیجے میں اس کی فوری موت ہو گئی۔

میڈیکو لیگل رسمی کارروائی مکمل کرنے کے بعد لاش اہل خانہ کے حوالے کردی گئی۔

پولیس نے ایف سی اہلکار کے ہلاکت کو ٹارگٹ کلنگ قرار دیا ہے، تاہم فوری طور پر کسی فرد یا گروہ نے حملے کی ذمہ داری قبول نہیں کی، مزید تحقیقات جاری ہیں۔

یہ حملے ایک روز قبل بلوچستان کے اضلاع ہرنائی اور قلات اور خیبر پختونخوا کے ڈیرہ اسمٰعیل خان میں انسداد دہشت گردی کی بڑی کارروائیوں میں 23 دہشت گردوں کی ہلاکت اور 22 سیکورٹی اہلکاروں کی ہلاکت کے بعد ہوئے۔