بلوچستان میں خونریز حملے، دو خواتین خودکش حملہ آور شامل

اسلام آباد (ڈیلی اردو) پاکستان کے وزیرِ دفاع خواجہ آصف نے دعویٰ کیا ہے کہ گذشتہ روز بلوچستان میں ہونے والے حملوں میں شدت پسندوں نے دو خواتین کو بھی استعمال کیا۔

اتوار کو سیالکوٹ میں پریس کانفرنس سے خطاب کرتے ہوئے خواجہ آصف نے کہا کہ شدت پسند نوجوان لڑکیوں اور لڑکوں کی ذہن سازی کر رہے ہیں۔ انہوں نے بتایا کہ کل کے واقعات میں دو جگہوں پر خواتین کو بھی استعمال کیا گیا۔

وزیرِ دفاع نے مزید کہا کہ سکیورٹی اداروں نے شدت پسندوں کے کوآرڈینیٹڈ حملے ناکام بنا دیے ہیں اور وہ اب ’موپنگ اپ آپریشنز‘ میں مصروف ہیں۔

ایک سوال کے جواب میں انہوں نے کہا کہ بلوچستان میں گذشتہ ڈیڑھ سال سے نسبتاً امن تھا، تاہم شدت پسندوں کے ٹھکانوں کو نشانہ بنانا ناگزیر ہے، چاہے وہ ملک کے اندر ہوں یا باہر۔ 

انہوں نے کہا، “اگر افغانستان ان کی پشت پناہی کر رہا ہے تو ہم کوئی بھی قدم اٹھانے میں دریغ نہیں کریں گے۔”

قبل ازیں پاکستان فوج کے شعبہ تعلقاتِ عامہ (آئی ایس پی آر) نے دعویٰ کیا کہ کوئٹہ سمیت بلوچستان کے متعدد شہروں میں ہونے والے حملوں میں کم از کم 92 شدت پسند اور 15 سکیورٹی اہلکار ہلاک ہوئے۔

آئی ایس پی آر کے مطابق جمعہ کو پنجگور اور شابان میں مختلف کارروائیوں میں 41 شدت پسند ہلاک ہوئے، جس کے بعد دو روز میں ہلاک ہونے والے شدت پسندوں کی تعداد 133 ہو گئی۔

بیان کے مطابق ہفتے کو ہونے والے حملوں میں 18 عام شہری بھی ہلاک ہوئے، جن میں خواتین اور بچے شامل ہیں۔

دوسری جانب، کالعدم بلوچ لبریشن آرمی (بی ایل اے) نے بلوچستان حملوں میں دو خودکش خواتین کی شمولیت کی تصدیق کر دی ہے۔

پاکستان میں کالعدم تنظیم بی ایل اے نے مجید بریگیڈ کی پہلی خاتون خودکش حملہ آور کی تصویر جاری کی۔

تنظیم کے مطابق حوا بلوچ عرف دروشم نے گوادر میں پاکستانی سکیورٹی فورسز کے خلاف حملے کے دوران خودکش دھماکہ کیا، جس میں وہ ہلاک ہوئیں۔

بی ایل اے نے مجید بریگیڈ کی دوسری خاتون خودکش حملہ آور کی تصویر بھی جاری کی۔

تنظیم کے مطابق عاصفہ مینگل سن 2002 میں پیدا ہوئیں، اوائل 2024 میں بی ایل اے میں شامل ہوئیں، اور نوشکی میں پاکستانی سکیورٹی فورسز کے خلاف حملے میں خودکش دھماکے کے نتیجے میں ہلاک ہوئیں۔