بلوچستان میں دہشت گردانہ حملوں کا سلسلہ جاری، 6 ہلاک اور متعدد زخمی

کوئٹہ (ڈیلی اردو/بی بی سی) پاکستان کے شورش زدہ صوبے بلوچستان کے دارالحکومت کوئٹہ سمیت مختلف علاقوں میں فائرنگ اور بم دھماکوں کے مختلف واقعات میں چھ افراد کی ہلاکت اور متعدد کے زخمی ہونے کی اطلاعات ہیں۔

پولیس کے مطابق کوئٹہ کے علاقے سریاب میں ولیج ایڈ میں سکیورٹی فورسز کی ایک چیک پوسٹ پر حملے کے علاوہ فائرنگ کے واقعات میں کم از کم ایک شخص ہلاک اور چھ سے زائد زخمی ہوگئے ہیں۔

ایس ایس پی آپریشنز کوئٹہ آصف خان نے بتایا کہ ان کے واقعات کے بعد زخمیوں کو طبی امداد کے لیے ہسپتال منتقل کیا گیا ہے جبکہ ہلاک ہونے والے شخص کی لاش بھی ہسپتال منتقل کر دی گئی ہیں۔

ولیج ایڈ کے علاقے میں ہونے والے حملے میں تین سکیورٹی اہلکاروں کے زخمی ہونے کی بھی اطلاعات ہیں تاہم پولیس نے تاحال اس کی تصدیق نہیں کی ہے۔

وزیر داخلہ کے معاون برائے میڈیا بابر خان یوسفزئی نے بتایا کہ کوئٹہ میں دو مقامات پر کالعدم تنظیموں کے حملوں کو ناکام بنایا گیا۔

دوسری جانب ضلع کوئٹہ کے نواحی علاقے اغبرگ میں نامعلوم افراد نے پولیس کی ایک چوکی پر حملہ کیا۔

پولیس کے مطابق اس حملے میں ایک پولیس اہلکار زخمی ہوا جبکہ حملہ آوروں نے چوکی پر موجود ایک گاڑی کو بھی نذر آتش کیا ہے۔

اس کے علاوہ ایران سے متصل ضلع پنجگور میں نامعلوم مسلح افراد نے اتوار کی شب خدابادان سمیت تین مقامات پر حملے کیے۔

ایک سینیئر سرکاری اہلکار نے نام ظاہر نہ کرنے کی شرط پر بتایا کہ ان حملوں میں پانچ افراد مارے گئے جو کہ سرکار کے حامی بتائے جاتے ہیں۔

اہلکار نے دعویٰ کیا کہ سیکیورٹی فورسز کی جوابی کاروائی چھ 6 حملہ آور بھی مارے گئے ہیں۔