بلوچستان میں سیکیورٹی فورسز کی کارروائیاں، 7 دہشتگرد ہلاک اور 2 اہلکار ہلاک

کوئٹہ + پنجگور (ڈیلی اردو رپورٹ) صوبہ بلوچستان کے مختلف علاقوں میں سیکیورٹی فورسز کی دہشتگردوں کے خلاف کارروائیاں جاری ہیں۔ بلوچستان کے ضلع زیارت میں محکمہ انسداد دہشت گردی (سی ٹی ڈی) اور سیکورٹی فورسز کے ساتھ فائرنگ کے تبادلے میں 7 دہشت گرد ہلاک ہوگئے۔

سی ٹی ڈی کے ذرائع کا کہنا ہے کہ زیارت کے علاقے چوتیر میں سی ٹی ڈی اور سیکیورٹی فورسز کے ساتھ مسلح جھڑپ میں 7 دہشت گرد ہلاک ہوگے۔

سی ٹی ڈی کے ذرائع کا کہنا ہے کہ ہلاک دہشت گردوں کا تعلق کالعدم تنظیم بلوچ لبریشن آرمی (بی ایل اے) سے ہے۔

جبکہ پنجگور میں دہشتگردوں کے حملے میں فرنٹیئر کور (ایف سی) کے دو اہلکار ہلاک ہو گئے۔

سی ٹی دی حکام کے مطابق زیارت اور ہرنائی کے درمیانی علاقے میں خفیہ اطلاعات کی بنیاد پر آپریشن کیا گیا۔ کارروائی کے دوران سیکیورٹی فورسز اور شدت پسندوں کے درمیان شدید فائرنگ کا تبادلہ ہوا، جس کے نتیجے میں کالعدم تنظیم بلوچستان لبریشن آرمی (بی ایل اے) سے تعلق رکھنے والے سات دہشتگرد ہلاک کر دیے گئے۔ حکام کا کہنا ہے کہ علاقے میں کلیئرنس آپریشن جاری ہے۔

دوسری جانب ضلع پنجگور میں دہشتگردوں نے ایف سی اہلکاروں پر اس وقت حملہ کر دیا جب وہ معمول کے مطابق سامان لینے کے لیے روانہ ہوئے تھے۔ مقامی ذرائع کے مطابق گھات لگائے مسلح افراد نے اہلکاروں کو نشانہ بنایا، جس کے نتیجے میں دونوں اہلکار موقع پر ہی ہلاک ہو گئے۔

سیکیورٹی اداروں نے واقعے کے بعد علاقے کا محاصرہ کر کے سرچ آپریشن شروع کر دیا ہے۔