بلوچستان: واشک میں سی ٹی ڈی کی کارروائی، کالعدم ٹی ٹی پی کے 5 دہشت گرد ہلاک، 3 فرار

کوئٹہ (نمائندہ ڈیلی اردو) صوبہ بلوچستان کے ضلع واشک میں کاؤنٹر ٹیررازم ڈیپارٹمنٹ (سی ٹی ڈی) نے کارروائی کرتے ہوئے پانچ مبینہ دہشت گردوں کو ہلاک کردیا۔

ترجمان سی ٹی ڈی کے مطابق واشک کے علاقے بسیمہ میں سی ٹی ڈی کی کارروائی کے دوران فائرنگ کے تبادلے میں 5 مبینہ حملہ آور مارے گئے۔اور یہ سی پیک روٹ پر فورسز پر حملوں کی منصوبہ بندی کر رہے تھے ۔

ترجمان سی ٹی ڈی کے مطابق فائرنگ کے دوران حملہ آوروں کے تین ساتھی فرار ہوگئے۔

سی ٹی ڈی ترجمان کا مزید کہنا ہے کہ حملہ آوروں کے زیر استعمال گھر سے اسلحہ و گولہ بارود برآمد کیا گیا ہے۔ جبکہ سی ٹی ڈی نے مکان کی تلاشی کے دوران بڑی مقدار میں اسلحہ گولہ و بارود بر آمد کر لیا۔

سی ٹی ڈی کی جانب سے فراہم کردہ معلومات کے مطابق مارے جانے والے افراد کا تعلق کالعدم تنظیم سے تھا۔

سی ٹی ڈی حکام کا کہنا ہے کہ ہلاک دہشت گردوں کی شناخت کا عمل اور فرار ہونے والے انکے ساتھیوں کی تلاش جاری ہے۔ جبکہ سی ٹی ڈی کی جانب سے لاشیں ہسپتال منتقل کرکے موقعے سے شواہد اکھٹے کرکے مزید تفتیش شروع کردی گئی ہے۔

حکام کے مطابق علاقے کو مکمل طور پر گھیرے میں لیکر سرچنگ کا عمل بھی جاری ہے۔

دوسری جانب کالعدم تنظیم تحریک طالبان پاکستان کے ترجمان محمد خراسانی نے اپنے ایک جاری کردہ بیان میں کہا کہ تمام مجاہدین کو کچھ عرصہ قبل گرفتار کیا گیا تھا جنہیں بلوچستان کے نواحی علاقوں میں لے جاکر مارا گیا۔

واضح رہے کہ گزشتہ دنوں ضلع پشین کے علاقے سرخاب میں بھی سی ٹی ڈی کی کارروائی میں کالعدم تنظیم تحریک طالبان پاکستان کے 4 مبینہ دہشت گرد ہلاک ہوگئے تھے۔