بلوچستان: پشین میں سی ٹی ڈی کارروائی، کالعدم بی ایل اے کے 10 شدت پسند ہلاک

کوئٹہ (ڈیلی اردو) پاکستان کے شورش زدہ صوبے بلوچستان کے ضلع پشین میں کاؤنٹر ٹیررازم ڈیپارٹمنٹ (سی ٹی ڈی) نے خفیہ اطلاع پر کارروائی کرتے ہوئے کالعدم بلوچ لبریشن آرمی (بی ایل اے) کے 10 شدت پسندوں کو ہلاک کر دیا۔

تفصیلات کے مطابق سی ٹی ڈی نے پشین میں کارروائی کے دوران کالعدم بی ایل اے سے تعلق رکھنے والے 10 شدت پسندوں کو ہلاک کیا، جبکہ کارروائی کے دوران 10 سی ٹی ڈی اہلکار زخمی بھی ہوئے۔

منگل کے روز وزیراعلیٰ بلوچستان کے معاونِ خصوصی شاہد رند کے ہمراہ مشترکہ پریس کانفرنس کرتے ہوئے ڈی آئی جی سی ٹی ڈی اعتزاز احمد گورایہ نے بتایا کہ سی ٹی ڈی نے خفیہ اطلاع پر پشین میں کارروائی کی، جس میں کالعدم بلوچ لبریشن آرمی کے 10 شدت پسند ہلاک ہوئے۔

ڈی آئی جی سی ٹی ڈی کے مطابق کارروائی کے دوران شدت پسندوں کے قبضے سے بھاری مقدار میں اسلحہ اور دھماکا خیز مواد برآمد ہوا، جس میں راکٹ لانچر، ہینڈ گرنیڈز اور کلاشنکوفیں شامل ہیں۔

ان کا کہنا تھا کہ برآمد ہونے والے جدید اسلحے کا فرانزک تجزیہ کرایا جائے گا، جبکہ شدت پسندوں کے پاس اس نوعیت کا جدید اسلحہ ہونا ایک سوالیہ نشان ہے۔

اعتزاز احمد گورایہ نے بتایا کہ کارروائی کے دوران 10 سی ٹی ڈی اہلکار زخمی ہوئے، جبکہ ڈپٹی کمشنر پشین اور ان کی ٹیم نے آپریشن میں بھرپور تعاون کیا۔ ڈی آئی جی سی ٹی ڈی نے شدت پسندوں کو پیغام دیا کہ وہ ہتھیار ڈال کر قومی دھارے میں شامل ہو جائیں۔

اس موقع پر وزیراعلیٰ بلوچستان کے معاونِ خصوصی شاہد رند نے کہا کہ ریاست کے سامنے کھڑے ہونے والوں سے آہنی ہاتھوں سے نمٹا جائے گا اور دہشت گردی پھیلانے والوں کو کیفرِ کردار تک پہنچایا جائے گا۔ انہوں نے واضح کیا کہ کالعدم تنظیموں کے سہولت کاروں کو کسی قسم کی رعایت نہیں دی جائے گی۔