بلوچستان: کیچ میں سیکورٹی فورسز کا آپریشن، انتہائی مطلوب کمانڈر سمیت 4 دہشت گرد ہلاک

راولپنڈی (ک م) پاکستان کے صوبہ بلوچستان کے ضلع کیچ کے علاقے بالگتر میں سیکیورٹی فورسز نے خفیہ اطلاع پر آپریشن کے دوران 4 دہشت گردوں کو ہلاک کردیا، مارے گئے دہشت گردوں میں انتہائی مطلوب سرغنہ ثنا عرف بارو بھی شامل ہے۔

پاکستانی فوج کے شعبہ تعلقات عامہ (آئی ایس پی آر) کے بیان کے مطابق ضلع کیچ میں سیکیورٹی فورسز اور دہشت گردوں کے درمیان فائرنگ کے تبادلے میں 4 دہشت گرد مارے گئے، ہلاک دہشت گردوں میں انتہائی مطلوب سرغنہ ثنا عرف بارو بھی شامل ہے۔

کمانڈر ثنا عرف بارو مکران ڈویژن میں خودکش بمبار بھرتی کرتا تھا، مارے گئے دہشت گردوں سے اسلحہ و گولہ بارود بھی برآمد کیا گیا۔

آپریشن کے بعد علاقے میں دہشت گردوں کے خاتمے کے لیے کلیئرنس آپریشن جاری ہے۔

آئی ایس پی آر نے کہا کہ سیکیورٹی فورسز بلوچستان میں دہشت گردی کے خاتمے کے لیے پرعزم ہیں۔