بلوچستان:کوئٹہ میں پولیس موبائل کے قریب دھماکا، 4 افراد ہلاک 21 زخمی

کوئٹہ (نمائندہ ڈیلی اردو) صوبہ بلوچستان کے دارالحکومت کوئٹہ میں ایک مصروف بازار کے قریب دھماکہ ہوا ہے، جس میں چار افراد ہلاک اور 21 زخمی ہو گئے۔ دھماکہ ڈبل روڈ پر پولیس موبائل وین کو نشانہ بنا کر کیا گیا۔

بلوچستان حکومت کے ترجمان شاہد رند کے مطابق دھماکے کے نتیجے میں پولیس موبائل وین شدید متاثر ہوئی، جبکہ قریب کھڑی ایک موٹرسائیکل بھی تباہ ہو گئی۔ دھماکے کے بعد سکیورٹی فورسز نے علاقے کو گھیرے میں لے لیا اور زخمیوں کو فوری طور پر ہسپتال منتقل کر دیا گیا۔

حکومتِ بلوچستان کے ہیلتھ کوآرڈینیٹر ڈاکٹر وسیم بیگ نے تین افراد کی ہلاکت اور 21 زخمیوں کی تصدیق کی ہے۔ ہسپتال ذرائع کے مطابق متعدد زخمیوں کی حالت تشویشناک ہے، جس کے باعث ہلاکتوں میں اضافے کا خدشہ ہے۔

ترجمان بلوچستان حکومت نے دھماکے کی مذمت کرتے ہوئے کہا ہے کہ واقعے میں ملوث شدت پسندوں کو انصاف کے کٹہرے میں لایا جائے گا۔ سکیورٹی ادارے دھماکے کی نوعیت اور اس کے محرکات کی تحقیقات کر رہے ہیں۔

تاحال کسی تنظیم نے حملے کی ذمہ داری قبول نہیں کی۔

براس کے ترجمان کا دعوی: بلوچستان میں پاکستانی فورسز پر 48 سے زائد منظم حملے

بلوچ راجی آجوئی سنگر (براس) کے ترجمان نے دعویٰ کیا ہے کہ 27 مارچ 1948 کو پاکستان کی جانب سے بلوچستان پر قبضے کے سیاہ دن کی مناسبت سے، براس کے سرمچاروں نے پاکستانی فوج، اس کی ذیلی فورسز، عسکری تنصیبات اور معدنیات لے جانے والی گاڑیوں پر منظم حملے شروع کر دیے ہیں۔

حملوں کا آغاز 26 مارچ کو کیا گیا تھا اور اب تک براس کے سرمچار بلوچستان بھر میں 48 سے زائد کارروائیاں کر چکے ہیں۔ ان کارروائیوں کے دوران پاکستانی فورسز اور خفیہ اداروں کے متعدد اہلکار ہلاک ہوئے ہیں، جبکہ پاکستانی ذیلی فورسز کی کئی چوکیوں پر قبضہ بھی کر لیا گیا ہے۔

حملوں کا سلسلہ تاحال جاری ہے، اور براس کی جانب سے مزید تفصیلات جلد میڈیا کو فراہم کی جائیں گی۔