بلوچستان:کیچ میں دہشت گردوں کی فائرنگ سے خاتون پولیس اہلکار ہلاک، شوہر اور بچہ زخمی

کوئٹہ (ڈیلی اردو) پاکستان کے شورش زدہ صوبہ بلوچستان کے ضلع کیچ میں دہشت گردوں کی فائرنگ سے ایک خاتون پولیس کانسٹیبل ہلاک جبکہ ان کے شوہر اور ایک بچہ زخمی ہوگئے۔

پولیس حکام کے مطابق واقعہ آبسر ریسرچ فارم کے قریب پیش آیا۔ 

ابتدائی معلومات کے مطابق فائرنگ اس وقت کی گئی جب لیڈی کانسٹیبل شکیلہ اپنے شوہر سنیل جان اور بچوں کے ہمراہ موٹر سائیکل پر تربت شہر کی جانب جا رہی تھیں۔

پولیس کے مطابق فائرنگ کے نتیجے میں لیڈی کانسٹیبل شکیلہ موقع پر ہی ہلاک ہوگئیں جبکہ ان کے شوہر اور آٹھ سالہ بچہ زخمی ہوگئے۔ واقعے کے دوران سات ماہ کا بچہ محفوظ رہا۔

کوئٹہ میں پولیس حکام کے مطابق لیڈی کانسٹیبل کورٹ ڈیوٹی کے لیے جا رہی تھیں جب انہیں نشانہ بنایا گیا۔ 

حکام کا کہنا ہے کہ واقعے کے محرکات فوری طور پر معلوم نہیں ہو سکے اور تحقیقات شروع کر دی گئی ہیں۔

پولیس ذرائع کے مطابق ابتدائی طور پر یہ شبہ ظاہر کیا جا رہا ہے کہ حملے میں خاتون کے شوہر کو بھی نشانہ بنانے کی کوشش کی گئی تھی۔

واضح رہے کہ بلوچستان میں گزشتہ چند ہفتوں کے دوران کسی خاتون پولیس اہلکار کی ہلاکت کا یہ دوسرا واقعہ ہے۔ 

اس سے قبل اپریل کے تیسرے ہفتے میں ضلع خضدار کے علاقے باجوئی میں دہشت گردوں کی فائرنگ سے لیڈی کانسٹیبل ملک ناز ہلاک ہوگئی تھیں۔