بنوں اور خیبر میں دہشتگردانہ حملے، رابطہ پل اڑا، تھانے اور چیک پوسٹ پر حملے

بنوں/خیبر (نمائندگان ڈیلی اردو) پاکستان کے شورش زدہ صوبے خیبرپختونخوا کے ضلع بنوں اور خیبر میں دہشتگردانہ کارروائیوں کا سلسلہ جاری ہے، جس میں رابطہ پل اڑانے اور تھانے و چیک پوسٹ پر حملے شامل ہیں۔

بنوں میں رابطہ پل اڑا دیا گیا

بنوں کے علاقے ممند خیل میں نامعلوم مسلح افراد نے رابطہ پل کو بارودی مواد سے نشانہ بنایا، جس سے عوام کو آمدورفت میں شدید مشکلات کا سامنا ہے۔

پولیس کے مطابق دھماکہ رات کی تاریکی میں ہوا اور اس سے پل کو نقصان پہنچا۔ تحقیقات کے مطابق، یہ سلسلہ پہلے بھی جاری رہا ہے اور علاقے میں نامعلوم مسلح افراد پہلے بھی کئی رابطہ پل بارودی مواد سے اڑا چکے ہیں، جنہیں بعد میں عارضی طور پر دوبارہ تعمیر کیا گیا۔

بنوں میں تھانے پر فائرنگ

بنوں کے تھانہ احمد زئی پر نامعلوم افراد نے فائرنگ کی، جس کے نتیجے میں ایڈیشنل ایس ایچ او حسن الماب خلیفہ گل نواز زخمی ہو گئے۔ زخمی اہلکار کو فوری طور پر اسپتال منتقل کر دیا گیا۔ حملے کے جواب میں پولیس نے بھی جوابی فائرنگ کی اور ملزمان و پولیس کے درمیان فائرنگ کا سلسلہ کافی دیر جاری رہا۔

خیبر میں چیک پوسٹ پر دستی بم حملہ

دریں اثنا قبائلی ضلع خیبر کے تھانہ باڑہ کے حدود میں سید کریم پولیس چیک پوسٹ پر دستی بم سے حملہ کیا گیا۔ ایس ایچ او ہردم گل کے مطابق دستی بم چیک پوسٹ کے اندر پھٹ گیا، جس سے چیک پوسٹ کو جزوی نقصان پہنچا، تاہم پولیس اہلکار محفوظ رہے۔ حملے کے بعد دہشت گرد فرار ہونے میں کامیاب ہو گئے۔