بنوں: سابق پی ٹی آئی ناظم فدا محمد وزیر بم حملے میں زخمی، گاڑی تباہ

بنوں (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع بنوں میں پاکستان تحریک انصاف کے سابق ناظم فدا محمد وزیر ریموٹ کنٹرول بم دھماکے میں زخمی ہو گئے، جبکہ ان کی گاڑی مکمل طور پر تباہ ہو گئی۔

پولیس کے مطابق دھماکہ تھانہ ڈومیل کی حدود میں دفتر کے مرکزی گیٹ کے قریب پہلے سے نصب آئی ای ڈی پھٹنے سے ہوا۔ زخمی فدا محمد وزیر کو فوری طور پر خلیفہ گل نواز ٹیچنگ اسپتال منتقل کیا گیا، جہاں ان کی حالت خطرے سے باہر بتائی جا رہی ہے۔

دھماکے کے بعد پولیس کی بھاری نفری موقع پر پہنچ گئی اور علاقے کو گھیرے میں لے کر سرچ و سیکیورٹی آپریشن شروع کر دیا گیا۔ بم ڈسپوزل اسکواڈ بھی طلب کیا گیا ہے۔

حالیہ اطلاعات کے مطابق دفتر کے باہر گزشتہ روز اہل علاقہ نے دہشت گرد عناصر کو کھلے عام للکارا تھا، جس کے بعد یہ واقعہ علاقے میں خوف و ہراس کا سبب بنا۔ تاحال کسی گروہ نے اس حملے کی ذمہ داری قبول نہیں کی۔