بنوں سے سرکاری اسکول کا استاد اغوا

بنوں (نمائندہ ڈیلی اردو) خیبر پختونخوا کے ضلع بنوں میں نامعلوم افراد نے ایک سرکاری اسکول کے استاد کو اغواء کر لیا۔ واقعہ ٹوچی پل کے قریب اس وقت پیش آیا جب گورنمنٹ پرائمری اسکول نرمی خیل کے استاد فرمان اللہ اپنے گاؤں نورڑ سے اسکول جا رہے تھے۔

مقامی ذرائع کے مطابق، نامعلوم افراد نے استاد کو زبردستی ایک گاڑی میں بٹھایا اور نامعلوم مقام کی طرف روانہ ہو گئے۔ فرمان اللہ نہ صرف تدریسی خدمات انجام دے رہے تھے بلکہ ایک نجی کلینک بھی چلاتے تھے۔

ذرائع کا کہنا ہے کہ مغوی استاد کی کسی کے ساتھ ذاتی دشمنی یا عداوت کی کوئی اطلاع نہیں ملی۔ پولیس نے واقعے کی تحقیقات شروع کر دی ہیں اور مغوی کی بازیابی کے لیے کوششیں جاری ہیں۔