بنوں: عسکریت پسندوں کی فائرنگ سے امن کمیٹی کے 4 ارکان ہلاک

بنوں (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع بنوں کے علاقے ہوید میں عسکریت پسندوں نے امن کمیٹی کے ارکان پر فائرنگ کر دی، جس کے نتیجے میں چار افراد ہلاک ہو گئے۔

پولیس کے مطابق واقعہ تھانہ ہوید کی حدود میں گلبدین لنڈی ڈاک، مزنگہ چوک کے قریب پیش آیا۔ امن کمیٹی کے ارکان ایک جرگے سے واپس آ رہے تھے کہ نامعلوم عسکریت پسندوں نے ان کی گاڑی پر اچانک فائرنگ کر دی۔

پولیس کا کہنا ہے کہ فائرنگ کے نتیجے میں نصیب، حامد، ضیاء اللہ اور فوجی نامی امن کمیٹی کے ارکان موقع پر ہی ہلاک ہو گئے، جن میں باپ اور بیٹا بھی شامل ہیں۔

واقعے کی اطلاع ملتے ہی پولیس کی بھاری نفری جائے وقوعہ پر پہنچ گئی اور علاقے کو گھیرے میں لے کر سرچ آپریشن شروع کر دیا، تاہم حملہ آور فرار ہونے میں کامیاب ہو گئے۔

پولیس کے مطابق ہلاک ہونے والوں کی لاشیں پوسٹ مارٹم کے لیے ڈسٹرکٹ ہیڈ کوارٹر اسپتال منتقل کر دی گئی ہیں، جبکہ واقعے کی تحقیقات شروع کر دی گئی ہیں اور ملزمان کی گرفتاری کے لیے کارروائیاں جاری ہیں۔

مقامی ذرائع کے مطابق علاقے میں امن کمیٹی نے عسکریت پسندوں کے خلاف مزاحمت کے لیے اسلحہ اٹھا رکھا ہے، جس کے باعث صورتحال کشیدہ بتائی جا رہی ہے۔