بنوں میں امامت کے تنازع پر فائرنگ سے پولیس اہلکار سمیت 3 افراد ہلاک، ایک زخمی

بنوں (ڈیلی اردو) صوبہ خیبر پختونخوا کے ضلع بنوں کے علاقے گلا خیل داؤد شاہ میں مسجد امامت کے تنازع پر دو فریقین کے درمیان فائرنگ سے باپ بیٹے سمیت تین افراد ہلاک اور ایک زخمی ہوگیا۔

تھانہ کینٹ کی حدود علاقہ گلا خیل داؤد شاہ میں پیش آنے والے اس واقعے میں ہلاک ہونے والوں میں باپ اور دو بیٹے شامل ہیں۔

فائرنگ کے بعد ملزمان فرار ہوگئے، لاشوں اور زخمی شخص کو ڈسٹرکٹ ہیڈکوارٹر ہسپتال بنوں منتقل کر دیا گیا۔

پولیس کے مطابق عشاء کی نماز کے وقت امام مسجد چھٹی پر تھے تو اس دوران فریقین میں نماز پڑھانے پر تنازع ہوا۔

ہلاک ہونے والوں میں ایک شفقت اللہ نامی پولیس اہلکار بھی شامل ہے، جو کہ کمشنر بنوں ڈویژن کے اسکواڈ میں تھا۔

پولیس نے واقعہ کی تحقیقات کا آغاز کردیا ہے۔