بنوں میں دہشت گردوں نے سنٹرل جیل پولیس کے وارڈن کو اغواء کر لیا

بنوں (نمائندہ ڈیلی اردو) پاکستان کے شورش زدہ صوبہ خیبر پختونخوا کے ضلع بنوں میں مسلح دہشت گردوں نے سنٹرل جیل پولیس کے ایک وارڈن کو اغواء کر لیا، جس کے بعد علاقے میں سیکیورٹی صورتحال مزید کشیدہ ہو گئی ہے۔

سرکاری ذرائع کے مطابق سنٹرل جیل پولیس کے وارڈن سفیر خان ڈیوٹی مکمل کرنے کے بعد گھر واپس جا رہے تھے کہ تھانہ کینٹ کی حدود پیران داؤد شاہ کے قریب نامعلوم مسلح دہشت گردوں نے انہیں راستے میں روک کر اغواء کر لیا اور موقع سے فرار ہو گئے۔

واقعے کی اطلاع ملتے ہی پولیس اور سیکیورٹی ادارے فوری طور پر موقع پر پہنچ گئے اور علاقے کو گھیرے میں لے کر مختلف مقامات پر ناکہ بندیاں قائم کر دی گئیں۔

مغوی اہلکار کی بازیابی کے لیے سرچ آپریشن جاری ہے جبکہ قانون نافذ کرنے والے ادارے اغواء کاروں کا سراغ لگانے کی کوشش کر رہے ہیں۔