بنوں میں سکیورٹی فورسز کا بڑا آپریشن، 24 دہشت گرد ہلاک

راولپنڈی (ک م ) پاکستان کے شورش زدہ صوبہ خیبر پختونخوا کے ضلع بنوں میں سکیورٹی فورسز نے مشترکہ انٹیلی جنس اطلاعات کی بنیاد پر بڑے پیمانے پر آپریشن کرتے ہوئے 24 دہشت گردوں کو ہلاک کرنے کا دعویٰ کیا ہے۔ کارروائی حالیہ دنوں میں ضلع میں شدت پسند حملوں، پولیس کو نشانہ بنانے کے واقعات اور گاڑی کے ذریعے خودکش حملے کے بعد کی گئی۔

پاک فوج کے شعبۂ تعلقات عامہ (آئی ایس پی آر) نے سوشل میڈیا پلیٹ فارم ایکس پر جاری بیان میں کہا کہ گزشتہ 24 گھنٹوں کے دوران بنوں اور اس سے ملحقہ علاقوں میں متعدد انٹیلی جنس بیسڈ آپریشنز کیے گئے، جن کے دوران سکیورٹی فورسز اور دہشت گردوں کے درمیان شدید فائرنگ کا تبادلہ ہوا۔

بیان کے مطابق کارروائیوں میں مجموعی طور پر 24 دہشت گرد ہلاک ہوئے، جبکہ ان کے قبضے سے بھاری مقدار میں اسلحہ، گولہ بارود اور دیگر جنگی سامان بھی برآمد کیا گیا۔

آئی ایس پی آر کے مطابق ہلاک ہونے والے دہشت گرد سکیورٹی فورسز پر حملوں، دہشت گردی کی مختلف کارروائیوں اور بے گناہ شہریوں کے قتل سمیت متعدد سنگین جرائم میں ملوث تھے۔ فوج کا کہنا ہے کہ ان عناصر کے خلاف کارروائی کا مقصد علاقے میں امن و امان کی بحالی اور دہشت گردی کے نیٹ ورک کو ختم کرنا ہے۔

فوج کے مطابق حالیہ آپریشن اس وقت شروع کیے گئے جب بنوں میں شدت پسندوں کی سرگرمیوں میں اضافہ دیکھا گیا، جن میں پولیس پر حملے اور بارود سے بھری گاڑی کے ذریعے خودکش حملے کی کوشش بھی شامل تھی۔ ان واقعات کے بعد سکیورٹی اداروں نے مشترکہ انٹیلی جنس اطلاعات کی بنیاد پر مختلف مقامات پر کارروائیاں کیں۔

آئی ایس پی آر نے کہا کہ علاقے میں کلیئرنس اور سرچ آپریشن بدستور جاری ہیں تاکہ دہشت گردوں کے سہولت کاروں اور فرار ہونے والے عناصر کو گرفتار کیا جا سکے۔ فوج نے اس عزم کا اعادہ کیا کہ دہشت گردی میں ملوث عناصر کو انصاف کے کٹہرے میں لایا جائے گا اور ملک سے دہشت گردی کے خاتمے کے لیے کارروائیاں بلا تعطل جاری رہیں گی۔

دوسری جانب، آزاد ذرائع سے اس کارروائی میں ہلاک ہونے والوں کی تعداد اور ان کی شناخت کی تاحال تصدیق نہیں ہو سکی، جبکہ کالعدم شدت پسند تنظیموں کی جانب سے بھی فوری طور پر کوئی ردعمل سامنے نہیں آیا۔