بنوں میں فوجی قافلے پر خودکش حملہ، افسر سمیت 3 اہلکار ہلاک، 4 زخمی

واشنگٹن (ش ح ط) پاکستان کے شورش زدہ صوبے خیبر پختونخوا کے ضلع بنوں میں سکیورٹی فورسز کے قافلے پر ایک خودکش حملے میں پاکستان آرمی کے ایک افسر سمیت تین اہلکار ہلاک جبکہ ایک شہری سمیت چار اہلکار زخمی ہو گئے ہیں۔

تفصیلات کے مطابق انڈس ہائی وے پر تھانہ ڈومیل کی حدود میں برمی خیل کے مقام پر سکیورٹی فورسز کے قافلے کو نشانہ بنایا گیا۔ حملے میں بارود سے بھری گاڑی کے ذریعے قافلے کی ایک گاڑی کو ٹارگٹ کیا گیا، جس کے نتیجے میں پاکستان آرمی کا ایک افسر اور دو اہلکار ہلاک جبکہ ایک راہگیر سمیت چار افراد زخمی ہو گئے۔

زخمیوں کو فوری طور پر کمبائنڈ ملٹری ہسپتال منتقل کر دیا گیا ہے جہاں انہیں طبی امداد دی جا رہی ہے۔

سکیورٹی ذرائع کے مطابق قافلہ پشاور سے بنوں جا رہا تھا کہ برمی خیل کے قریب یہ خودکش حملہ کیا گیا۔ دھماکہ انتہائی شدید نوعیت کا تھا جس سے علاقے میں خوف و ہراس پھیل گیا۔

ہلاک ہونے والوں میں نائیک شہباز، سپاہی آفتاب اور سپاہی بلال شامل ہیں، جبکہ زخمیوں میں سپاہی احسان، لانس نائیک اجمل، اکرام اور ایک شہری شامل ہے۔

بم ڈسپوزل اسکواڈ کے مطابق حملے میں تقریباً 150 سے 200 کلوگرام بارودی مواد استعمال کیا گیا۔ جائے وقوعہ سے شواہد اکٹھے کر لیے گئے ہیں اور تباہ شدہ گاڑی کے حصے بھی ملے ہیں۔

واقعے کے بعد سکیورٹی فورسز اور پولیس نے علاقے کو گھیرے میں لے کر سرچ آپریشن شروع کر دیا ہے۔ 

حکام کے مطابق واقعے کی تحقیقات جاری ہیں اور ذمہ دار عناصر کو جلد قانون کے کٹہرے میں لایا جائے گا۔