بنوں میں مسجد سے تین سرکاری ملازم بھائی اغوا، دو کی لاشیں برآمد

واشنگٹن (ش ح ط) پاکستان کے شورش زدہ صوبے خیبر پختونخوا کے ضلع بنوں کے نواحی علاقے حسن خیل (سوکڑی) میں عشاء کی نماز کے دوران پیش آنے والے افسوسناک واقعے میں نامعلوم دہشتگردوں نے مسجد سے تین سرکاری ملازم بھائیوں کو اغوا کرلیا، جن میں سے دو کو بعد ازاں ہلاک کر دیا گیا۔

پولیس کے مطابق واقعہ عشاء کی نماز کے وقت پیش آیا، جب تقریباً 12 مسلح شدت پسند، جو مبینہ طور پر پولیس کی وردیاں پہنے ہوئے تھے، مسجد میں داخل ہوئے۔ 

عینی شاہدین کے مطابق حملہ آوروں نے نمازیوں کو یرغمال بنا کر مخصوص طور پر تین بھائیوں — سعید اختر (کمشنر آفس میں ملازم)، پولیس کانسٹیبل امجد اور کانسٹیبل حضرت اللہ کو اسلحے کے زور پر اپنے ساتھ لے گئے۔

ذرائع کا کہنا ہے کہ اغوا کے کچھ دیر بعد پولیس میں تعینات دونوں بھائیوں، کانسٹیبل امجد اور کانسٹیبل حضرت اللہ کو فائرنگ کر کے ہلاک کر دیا گیا۔ 

دونوں کی لاشیں قریبی علاقے سے برآمد کر لی گئی ہیں۔

تیسرے بھائی سعید اختر کے حوالے سے تاحال کوئی مصدقہ اطلاع سامنے نہیں آئی، جبکہ اہل خانہ شدید تشویش میں مبتلا ہیں۔

واقعے کے بعد پولیس اور سکیورٹی فورسز کی بھاری نفری نے علاقے کو گھیرے میں لے کر سرچ آپریشن شروع کر دیا ہے۔