بنوں میں واپڈا ملازمین پر فائرنگ، دو زخمی، اغوا کی کوشش ناکام

بنوں (نمائندہ ڈیلی اردو) پاکستان کے شورش زدہ صوبہ خیبر پختونخوا کے ضلع بنوں کے علاقے ڈومیل ادھمی پل کے قریب عسکریت پسندوں نے واپڈا کے عملے پر فائرنگ کر دی، جس کے نتیجے میں دو ملازمین زخمی ہو گئے۔ واقعہ اس وقت پیش آیا جب واپڈا اہلکار ڈیوٹی پر مامور تھے۔

زخمی ہونے والوں میں عبد اللہ خان (ڈرائیور) اور نور محمد (لائن مین) شامل ہیں، جنہیں فوری طور پر طبی امداد کے لیے قریبی ہسپتال منتقل کیا گیا۔ ہسپتال ذرائع کے مطابق دونوں کی حالت خطرے سے باہر ہے۔

پولیس کے مطابق حملہ آوروں نے موقع پر موجود واپڈا سپرنٹنڈنٹ مراد علی خان کو اغواء کرنے کی کوشش بھی کی، تاہم ان کی مزاحمت کے باعث یہ کوشش ناکام رہی، جس کے بعد عسکریت پسند فرار ہو گئے۔

ڈی پی او بنوں یاسر آفریدی کے مطابق پولیس پارٹی کے موقع پر پہنچنے پر دہشت گردوں اور پولیس کے درمیان فائرنگ کا تبادلہ ہوا، جس کے بعد حملہ آور فرار ہونے میں کامیاب ہو گئے۔ 

واقعے کے بعد علاقے میں سرچ آپریشن شروع کر دیا گیا ہے۔