بنوں میں پولیس پر حملہ، دو عسکریت پسند ہلاک، خیسور رابطہ پل تباہ

بنوں (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع بنوں میں چشمی روڈ پر ڈومیل پولیس موبائل وین پر عسکریت پسندوں نے حملہ کر دیا، جبکہ خیسور رابطہ پل بارودی مواد سے اڑا دیا گیا۔

پولیس حکام کے مطابق چشمی روڈ پر پولیس موبائل وین پر حملے کے دوران فائرنگ کے تبادلے میں دو عسکریت پسند ہلاک کر دیے گئے۔ گاڑی میں ایس ایچ او صدر نواز خان بھی موجود تھے۔

انہوں نے بتایا کہ عسکریت پسندوں نے تھانہ میریان کی حدود میں خیسور رابطہ پل بارودی مواد سے اڑا دیا۔

12 جنوری کو بنوں میں پولیس نے تھانہ ڈومیل کی حدود کاشو پل چیک پوسٹ پر عسکریت پسندوں کا حملہ ناکام بنایا تھا۔ عسکریت پسندوں نے چیک پوسٹ پر چاروں اطراف سے فائرنگ کی تھی، تاہم پولیس کے جوانوں کی بھرپور جوابی کارروائی پر وہ فرار ہو گئے تھے۔

ڈی پی او یاسر آفریدی نے بتایا تھا کہ پولیس کے جوانوں نے عسکریت پسندوں کو بھاری جانی نقصان پہنچایا۔ ان کے خلاف کارروائی کے لیے ہمہ وقت تیار ہیں، انہیں چن چن کر مارا جائے گا اور چھپنے کا موقع نہیں دیا جائے گا۔

اس سے ایک ہفتہ قبل پشاور میں کاؤنٹر ٹیررازم ڈیپارٹمنٹ (سی ٹی ڈی) بنوں ریجن اور لکی مروت پولیس نے بیگوخیل کے علاقے میں مشترکہ انٹیلی جنس بیسڈ آپریشن کے دوران تین خطرناک عسکریت پسندوں کو ہلاک کر دیا تھا۔۔