بنوں: نجی بینک کی کیش وین پر پاکستانی طالبان کا حملہ، 8 کروڑ روپے سے زائد لوٹ لیے گئے

واشنگٹن (ش ح ط) پاکستان کے شورش زدہ صوبہ خیبر پختونخوا کے ضلع بنوں کی تحصیل ڈومیل میں پاکستانی طالبان کے مبینہ حملہ آوروں نے حبیب بینک کی کیش وین کو نشانہ بنا کر 8 کروڑ روپے سے زائد کی نقدی لوٹ لی۔

پولیس کے مطابق مسلح افراد نے کیش وین کو روک کر سیکیورٹی گارڈز کو یرغمال بنایا اور ان سے اسلحہ بھی چھین لیا۔ چھینے گئے اسلحے میں 4 بندوقیں، 2 پستول اور گولیاں شامل ہیں۔

بعد ازاں حملہ آوروں نے ڈرائیور اور سیکیورٹی گارڈز کو چھوڑ دیا اور موقع سے فرار ہوگئے۔

ذرائع کے مطابق نجی بینک کی کیش وین کو تھانہ ڈومیل کی حدود میں نشانہ بنایا گیا، جہاں مسلح افراد نے وین کو روک کر نقدی اور اسلحہ اپنے قبضے میں لے لیا۔

واقعے کے بعد ملزمان نے کیش وین اور لوٹی گئی رقم کی تصاویر سوشل میڈیا پر بھی جاری کیں۔

پولیس نے اطلاع ملتے ہی موقع پر پہنچ کر علاقے کو گھیرے میں لے لیا اور ملزمان کی تلاش کے لیے ناکہ بندی اور سرچ آپریشن شروع کر دیا ہے۔