بھارتی فوج مقبوضہ کشمیر پر ظلم وستم کے پہاڑ توڑ رہی ہے: جنرل زبیر محمود حیات

اسلام آباد (ڈیلی اردو) چیئرمین جوائنٹ چیفس آف اسٹاف کمیٹی جنرل زبیر محمود حیات نے کہا ہے کہ غاصب بھارتی فوج سات دہائیوں سے مقبوضہ کشمیر پر ظلم وستم کے پہاڑ توڑ رہی ہے۔ مسئلہ کشمیر پر اقوام متحدہ کی قراردادوں پر عملدرآمد کے بغیر خطے میں امن کا قیام ناممکن ہے۔

چیئرمین جوائنٹ چیفس آف سٹاف کمیٹی جنرل زبیر محمود حیات نے ایئر وار کالج کراچی میں کورس کے شرکا سے خطاب کرتے ہوئے کہا کہ خطے میں نمودار ہونے والے چیلنجز اور سیکیورٹی صورتحال سے نبردآزما ہونے کے لئے باہمی تعاون اور مسائل کا پرامن حل بہت ضروری ہے۔

جنرل زبیر محمود حیات کا کہنا تھا کہ پاکستان کی سلامتی کی صورتحال میں داخلی اور خارجی عوامل کار فرما ہیں، جنوبی ایشیاء میں امن کے لئے اس خطے میں اسٹریٹیجک استحکام کو برقرار رکھنا اہمیت کا حامل ہے۔

جموں و کشمیر کی حالیہ صورتحال پر گفتگو کرتے ہوئے چیئرمین جوائنٹ چیفس آف سٹاف کمیٹی نے کہاکہ غاصب بھارتی فوج سات دہائیوں سے کشمیریوں پر ظلم اور ناانصافی کے پہاڑ توڑ رہی ہے۔ مسئلہ کشمیر پر اقوام متحدہ کی قرار دادوں پر عمل درآمد کے بغیر خطے میں امن کا قیام ناممکن ہے۔

قبل ازیں ایئر وار کالج آمد پر کمانڈنٹ ایئر وار کالج ایئر وائس مارشل ذوالفقار احمد قریشی نے جنرل زبیر محمود حیات کا استقبال کیا۔