جبری گمشدگیوں پر انکوائری کمیشن کی رپورٹ: ستمبر میں 113 کیس نمٹا دیے گئے

اسلام آباد (ڈیلی اردو) پاکستان میں جبری گمشدگیوں پر انکوائری کمیشن کے چیئرمین جسٹس (ر) سید ارشد حسین شاہ نے کہا ہے کہ ستمبر 2025 کے دوران 113 لاپتا افراد کے کیس نمٹا دیے گئے ہیں۔

کمیشن کی جانب سے جمعے کو جاری کردہ ماہانہ رپورٹ میں بتایا گیا کہ ستمبر کے مہینے کے دوران 14 لاپتا افراد واپس اپنے گھروں کو پہنچنے میں کامیاب ہوئے۔

رپورٹ کے مطابق مارچ 2011 سے لے کر ستمبر 2025 تک کمیشن کو جبری گمشدگیوں کے مجموعی طور پر 10 ہزار 636 کیس موصول ہوئے، جن میں سے 8 ہزار 986 کیسز کو نمٹایا جا چکا ہے، جبکہ ایک ہزار 650 کیس اب بھی زیرِ تفتیش ہیں۔

ماہانہ رپورٹ میں بتایا گیا ہے کہ تفتیش کے بعد نمٹائے گئے کیسز کی شرح 84.48 فیصد بنتی ہے۔

رپورٹ کے مطابق جولائی سے ستمبر 2025 کی تین ماہ کی مدت میں کمیشن نے مجموعی طور پر 289 کیس نمٹائے، جو اوسطاً 96 کیس فی ماہ بنتے ہیں۔

چیئرمین جسٹس (ر) سید ارشد حسین شاہ نے مزید کہا کہ کمیشن نے لاپتا افراد کے اہل خانہ کی فلاح و بہبود کے لیے اقدامات کیے ہیں۔ اس مقصد کے لیے ایک خصوصی سیل قائم کیا گیا ہے جو اہل خانہ کو ریلیف فراہم کرتا ہے، جن میں لاپتا افراد کے بچوں کے فارم ’بی‘ کے اجرا کے معاملات شامل ہیں، جبکہ ایسے اہل خانہ کو پنشن کی فراہمی بھی یقینی بنائی جا رہی ہے جن کے پیارے سرکاری ملازم تھے۔