جرمن شہر منہائم میں مشتبہ کار ’حملہ‘، ایک شخص ہلاک، متعدد زخمی

برلن (ڈیلی اردو/ڈی پی اے/اے پی/ رائٹرز) جرمنی کے جنوب مغربی شہر منہائم میں ایک بڑا پولیس آپریشن جاری ہے۔ عوام سے کہا گیا ہے کہ وہ شہر کے مرکز کا رُخ نہ کریں۔ یہ آپریشن ایک ڈرائیور کی جانب سے اپنی گاڑی لوگوں کے ایک گروپ پر چڑھا دینے کے بعد شروع ہوا۔

جرمن پولیس کے ایک ترجمان اشٹیفان وِلہیلم کے مطابق ایک ڈرائیور نے اپنی کار پراڈے پلاٹز کے علاقے میں لوگوں کے ایک گروپ پر چڑھا دی، جس کی وجہ سے ایک شخص ہلاک ہو گیا۔ یہ علاقہ پیدل چلنے والوں کے لیے مخصوص ہے۔ پولیس ترجمان کے مطابق یہ واقعہ دن کے قریب 12:15 بجے پیش آیا، جس کے بعد شہر میں بڑے پیمانے پر پولیس تعینات کر دی گئی۔ ترجمان کا مزید کہنا تھا کہ متعدد افراد زخمی بھی ہیں، تاہم پولیس ابھی یہ نہیں بتا سکتی کہ کُل کتنے افراد زخمی ہیں یا ان کے زخموں کی شدت کیسی ہے۔

پولیس کا کہنا ہے کہ یہ واقعہ ‘پاراڈے پلاٹز اسکوائر‘ میں پیش آیا جو شہر کے مرکز میں واقع ہے۔ مزید یہ کہ تحقیقات کا سلسلہ جاری ہے اور کسی ممکنہ ذمہ دار شخص یا اس واقعے کے بارے میں مزید تفصیلات فراہم نہیں کی جا سکتیں۔

خبر رساں ادارے ایسوسی ایٹڈ پریس کے مطابق ایک شخص پولیس کی حراست میں ہے۔

ڈیلی اردو کو ملنے والی اطلاعات کے مطابق حملہ آور کی شناخت حج علی ایمن کے نام سے ہوئی ہے۔

عوام کو گھروں پر رہنے کی ہدایت

دوسری طرف پولیس کی طرف سے منہائم کے باسیوں سے کہا گیا ہے کہ وہ شہر کے مرکز کا رُخ نہ کریں اور اپنے گھروں پر رہیں۔

منہائم 326,000 کی آبادی کا شہر ہے، جو جرمنی کے معاشی حب کہلانے والے شہر فرینکفرٹ کے جنوب میں واقع ہے۔